MSO Diamond Jubilee lawmna ah Chief Minister in Mara te chu Zo hnahthlak an nih thu a sawi

Chief Minister Lalduhoma chuan nimin khan Mara Students Organisation (MSO) kum 60 tlin lawmna hun hmanpuiin, Mara te chu Zohnahthlak an nih thu a sawi a. Hmasawnna thar te chhawr tangkaitu lo ni tura inbuatsaih turin thalaite a chah bawk.

MSO kum 60 tlinna, Diamond Jubilee lungphun leh Jubilee Hall hawnna MSO Office-a neih a nih hnuah Govt. Siaha College Seminar Hall-ah Jubilee lawmna Inkhawm hi neih zui niin he hunah hian Chief Minister Lalduhoma chuan Mara Students' Organisation te lawmpuina hlanin, MSO chu Mara fate tana pawl tangkai, thalaite kaihruaitu, hnam huikhawmtu, Zohnahthlak unau dangte nena inpawhna tha kengkawhtu a nih thu leh Zirna lamah Mara thalaiten hma an sawn theih nan pawh an thawhhlawk hle thin tih a sawi a. Mara te chu Zohnahthlak an nihzia sawiin, “Prof. Federic K. Lehman, Illinois University pawhin a lehkhabu 'The Structure of Chin Society – 1963' ah ‘Lushai leh Lakherte hi thlah khat, chuahna thuhmun an ni a, hming hran inphuah mah se ‘Chin’ ve ve an ni’ tiin a lo sawi tawh a. Mara-te hi Zo hnahthlak dik tak, Zohnahthlak dangte ang bawk a Chhura thawnthu nei, Lusei tawng nena tawngkam thuhmun leh sawi dan inang tam tak nei a ni,” a ti.

Mara leh Lai ten Autonomous District Council an nei chu a hlu hle tih pawh Chief Minister chuan sawiin, “In zia, tawng leh tihdan venhimna atan leh hmasawnna tluantling neih nan lo hmang ngei rawh u.” a ti a, Zirna chu hmasawn zel tura kan inchher hriamna a nih angin zirna ngaihlu tura chahin, “Mara thalaite hi State Level Competitive Exam-ah in titha thin a. Zirna in ngaihlu tih a hriat a ni. Mizoram Level-a duhtawk mai lovin India Level-ah pawh rawn lang zel rawh u,” tiin a fuih a, Zirna lama hma kan sawn zel theih nan kumin kum kal mekah New Laty leh Lopu-ah cheng nuai 145 man ve ve Secondary School building sak a nih thu leh Theiri-ah cheng nuai 111 man Higher Secondary School building sak niin Tipa V-ah cheng nuai 188 man Hmeichhe Hostel sak a ni,” a ti bawk a. Ziak leh chhiar thiam vekna State hmasa ber kan nih thu leh khualzin hipluh lama India hmarchhaka hmasawn nasa ber kan ni bawk tih sawiin, “Kan ramin hmasawnna a hmu chho zel a, hmachhawp tam tak kan nei bawk. Heng hmasawnna tharte chhawr tangkaitu ni tur hian kan thalaite lo inbuatsaih sauh sauh ang che u,” a ti bawk.

MSO Diamond Jubilee lawmna hi Vice President T. John Tennyson chuan kaihruaiin khual zahawm MADC-a CEM M. Laikaw pawhin MSO te lawmpuina hlanin, an kal zelna turah duhsakna a hlan a. Mizoram sawrkarin MADC tana hmalakna tha tak tak a neihte tarlangin, Chief Minister hnenah lawmthu a sawi a ni.

Mara Students Organization (MSO) hi November ni 4, 1965 khan Shillong-ah din niin kumin hian kum 60 a tling ta a ni.