Mahni khua tihmasawn tur chuan mahni vek kan pawimawh - Chief Minister

North Khawbung khaw kum 100 tlin lawmna chu nimin khan neih niin Chief Minister Lalduhoma chuan khuallian niin a hmanpui a, Chief Minister chuan mahni khua ti hmasawn tur chuan mahni khua vek an pawimawh thu a sawi a ni.

North Khawbung Centenary Committee (NCCC) buatsaih North Khawbung Centenary lawmna lungphun chu Chief Minister hian hawngin hemi hnu hian North Khawbung Playground-a Lalruanga Hmun-ah Centenary lawmna neih zui nghal a ni a, Chief Minister chuan North Khawbung Lal ni thin Thanghlianga Sailo chu fakin, he khaw ropui tak a din theih chhan pawh a fin leh remhriat em vang a ni tih a sawi. Mizo pi leh pute sulhnu tha tak tak a awm thu leh Art & Culture Department-in a humhalh mek Lalruanga lung te a awm thu sawiin, tha taka humhalh turin a fuih bawk. Chief Minister chuan mahni khua ti-hmasawn tur chuan mahni vek an pawimawh thu sawiin, mahni khaw tana tan la zela, hmangaih taka enkawl turin a fuih a, Nimbu leh Sapthei an chin te pawh hmasawnna rahbi tha tak a ni thei tih sawiin. an hnathawhnaa taimak chhuah zel turin a chah a. Naupang leh thalai lehkha zir mekte an zirna atanga eizawnna tha tak hmua nun tha pan tura fuihin, ruihhlo chi hrang hrang laka fihlim turin a chah bawk a. Kum 200 an tlin hun pawha hlim taka an lawm theih nan kawtthler te, In sak dan te, tuichhe paih dan te leh khua enkawl dan te khuarei daih (sustainability) nen mil zawnga kal zel turin a fuih bawk.

North Khawbung khaw kum 100 tlin lawmna hi VCP C. Tluangliana chuan kaihruaiin Champhai North bialtu MLA leh Adviser to Chief Minister (Technical) Er. H. Ginzalala chu khual zahawm a ni a, zai chi hrang hrang leh thusawi te ngaihthlak niin tlai lamah Centenary lawmna ruai an theh nghal bawk a ni.

Nort Khawbung khua hian an khaw kum 100 tlin lawmna hi tun thla ni 5 khan an nei tan tawh a, nizan khan Concert neiin hun an hmang bawk a ni.