Football-a Mitdel te inelna ah Mizoram an Champion

Football hmanga Mitdel te an inelna, Greater Lion's Vision Cup 2025-ah Mizoram Blind Sport Association hnuaia Mizoram Blind Football Team-te chu an Champion.

Greater Lion's Vision Cup 2025 hi tun thla ni 8 leh ni 9 khan North Bengal-a Siliguri-ah khelh a ni a, Indian Blind Football Federation hriatpuina a khelh he Tournament-ah hian State Pali : Jharkhand, Nagaland, Mizo-ram leh West Bengal-te an tel a. West Bengal leh Mizoram Team-ten Final an khel a. Final-ah hian Mizoram Team hian West Bengal chu an Captain Shimon Chorei-a Hattrick siam hmanga hnehin 3-0 in hnehna an chang a, Mizoram Team Captain Shimon Chorei hi Man of the Tournament leh Top Scorer a thlan ni nghal bawkin he Tournament chhung hian goal 6 a khung a ni.

Champion Team-te hian niminpiah khan Sairang rawn thlengin Mizoram Blind Sports Association (MBSA) hruaitu thenkhat leh mitdel Football ngaihventu ten an lo hmuak a, MBSA Senior Vice President R Lalramthanga te chenna, Kanan Veng-ah hnehna an chan puala Pathian hnena lawmthu sawina neiin Champion Team-te hi Zanriah an buatsaihsak nghal a ni.