Central YMA hruaitute leh Local Council hruaitute an inkawm

Central YMA hruaitute leh Aizawl City Local Council hruaitute chu nimin khan Aizawl-a Central YMA Office-ah inkawmin thawhhona tur hrang hrang te an sawiho.

He inkawmhona hi Central YMA President R. Lalngheta chuan kaihruaiin thil chi hrang hrang an sawiho zingah ILP chungchang te, dan lova hnamdang sumdawng tam ta lutuk te, Aizawl khawpui chhung kawng siam mek en zui chungchang te leh ruihhlo do chungchang te chu a tel a. Ruihhlo do chungchangah YMA leh Local Council te tanho a tul zia te, YMA leh Local Council ten hriatpuina lehkha leh NoC pekchhuah chungchangah fimkhur taka kalpui a tul thu te an sawi a, Central YMA President R. Lalngheta chuan ruihhlo do kawngah chak takin hma lak an tum thu leh Local Council te tawiawmna an mamawh dawn thu a sawi a. Aizawl City Local Council President C. Lalbiaknunga chuan YMA in ruihhlo do kawnga khawtlang tana tha tura an ngaih chu Local Council in lo dodal loh tha an tih thu a sawi bawk.

Central YMA hruaitute hian tun thla ni 14 khan NHIDCL leh an hnuaia Contractor, Sairang leh Vairengte inkar kawng siamtute chu kawm bawkin an  kawng siam mek chu December chawlhkar hmasa berah tlawh nawn leh an tum thu an hrilh bawk a ni.