Buh Tin 3600 thar lawmna Chief Minister hovin hmang

Khawzawl District-a Tualte khuaa cheng JH. Lalnunmawia te chuan kumin hian Buh Tin 3600 zet tharin Inrinni, Nov. 215, 2025 khan buh chhun finna leh buh thar lawmna hun an hmang a, he hun hi Chief Minister Lalduhoma chuan a hmanpui a ni.

Thudawn danin JH. Lalnunmawia te hian Tualte khuaa Artlang ramah Buh hmun Tin 17 hmun-a zau-ah kumin hian buh an ching a, Tin 3600 (phur 1200) zet an tharchhuak a, Mizo Buh tehkhawng anga sawiin Mau tlawn zawn hnih leh Silai zawn chhunfin anga tam nia sawi a ni. Inrinni-a Buh chhun finna leh Buh thar lawmna an buatsaih ah hian Chief Minister Lalduhoma chuan hetianga buh thar tam hi he huna kal te hian an la hmuh a rin loh thu leh an hmu leh pawhin a ring chiah tawh lo tih sawiin, “A tam em avangin Mizo buh tam lam chhiar danah pawh hming a nei tawh lo a. Chuvang chuan he ni hi a hlu a ni,” a ti. A tharchhuaktu JH. Lalnunmawiate chhungkua lawmpuiin, midangte tana malsawmna thlen thintu an nihna Pathianin mal a sawm nia ahriat thu leh mite tana malsawmna ni zui zel turin a ngen a ni. Chief Minister chuan sawrkarin kuthnathawktute a ngaipawimawh tih pawh sawiin, “Sawhthing thartute ipte-a Support Price lut ringawt pawh hi a tam tham hle a. Hnathawktu, mi taimate tan kawl a eng mek a ni,” a ti.

Buh chhun finna leh buh thar lawmna hun hi Agriculture & Farmers Welfare Department Director R. Lalnunzira chuan kaihruaiin Rev. Rothuamluaia chuan hunserh a hmang a, Agriculture Minister PC. Vanlalruata leh Deputy Speaker Lalfamkima te pawhin thu an sawi a ni.

Tualte hian kumin ah Sawhthing atangin cheng nuai 163 vel an lalut a, Tomato atangin cheng nuai 175 vel an lalut tawh bawk a ni.