AMRUT leh SBM kalpui dan turah UD&PA leh PHE Department in thawhhona thuthlung an ziak

Mizoram-a Atal Mission for Rejuvenation and Urban Transformation (AMRUT) leh Swachh Bharat Mission (SBM) Scheme kalpui dan turah Urban Development & Poverty Alleviation (UD&PA) Department leh Public Health Engineering (PHE) Department-te chuan nimin khan thawhhona thuthlung (Charter of Convergence) an ziak.

Sewage Treatment Plant, Chite-a he thawhhona thuthlung an ziahna hunah hian UD&PA Minister K. Sapdanga chuan ni khata Aizawl khawpuiin tui a hman zat chu litre mtd 36 vel anih thu sawiin, drain mumal awm lohnaah chuan leiah a luangral a, chu chu Fur-a leimin a tam thin chhan pakhat a ni tih a sawi a. He thawhhona hi a hlawhtlin chuan khawpuia leimin venna tha tak a nih tur thu leh tuichhia chu sawngbawl (processed) a nih hnuah khawpui cheimawina atana hman theih a nih thu a sawi a. Tui hmangin khawpui chu hmasawnna rahbi thar an kaipui dawn tih a sawi a ni.

He Charter hnuaia Department pahnihte thawhhona tur langsar ber pahnih SBM leh AMRUT project-a component zingah hian SBM hnuaia Solid Waste Management (SWM) Component-ah cheng vbc. 30.68 a awm a. Hei hi ULB zawng zawng ah Solid Waste Management Centre (SWMC) sak nana hman tur a ruahman a ni a. SBM-G hnuaiah Plastic Waste Management Unit (PWMU)-te chu RD Block-a sak tura ruahman niin heng SWMC leh PWMU te hi a remchanna apiangah a kalkawp ang a. Unit khat anga a tam thei ang ber thawhho a ni ang.

SBM(U) hnuaia Used Water Management (UWM) component hnuaia Fund allocation cheng vbc. 88.84 awm chu PHED in a thawk (execute) anga, UD&PA-in fund a ruahman dawn bawk a. AMRUT Mission hnuaiah allocation cheng vbc. 157.78 awmin hemi atang hian First Instalment pumpui leh Second instalment tlem, a vaiin cheng vbc. 45 vel hman a ni tawh a. AMRUT component zingah Water Supply leh Sewerage & Septage Management te chu PHE Department in an enkawl a, Water Body Rejuvenation leh Green Space & Parks te chu UD&PA in an enkawl a ni.

He huna tarlan a nih danin Sewage Treatment Plant-ah hian ni khatah tuichhia megalitre 10 sawngbawl theih a nih laiin, tun dinhmunah chuan ni khatah megalitre 1 vel sawngbawl thin a ni.