Aizawl Zoological Park-a Sava bo zawn zel a ni

Aizawl Zoological Park atanga Sava chi khat, Pesquet's Parrot bo chu thenawm State Assam leh Meghalaya bakah Wildlife Crime Control Bureau thuneitute puihna nen ngawrh taka zawn chhunzawm mek a ni.

Deputy Conservator of Forests Aizawl Wildlife Division leh Aizawl Zoological Park Director Margaret Lalramchhani chuan Pesquet's Parrot hi dan lova tawlhruk niin Champhai-a an man hnuah Magistrate Order angin nikum February khan Aizawl Zoological Park-ah dah a ni tih a sawi a, he Sava hi Enclosure thar berah an dah a, a Chain link pawh a la tuiek loh avangin amaha a thlawhchhuah an rin loh thu a sawi a ni. Margaret-i chuan Sava bo hi Mizoram piahlamah State thenawm Meghalaya leh Assam Wildlife Department, Divisional Forest Officer, (DFO) leh Superintendent of Police tin te chu hriattir niin, lirthei tlan te an lo endik dawn tih a sawi a, Wildlife Crime Control Bureau pawh Sava bo ni atangin an hriattir nghal a, Guwahati, Kolkata leh Delhi thlengin Train Station tinah an mi leh sa te an tir bawk a, Investigation an ti ho mek a, Sairang Police te chuan Aizawl Zoological Park-a thawkte pawh thu zawhfiah an la kalpui mek a, thuthar a la awm rih lo tih a sawi bawk.

Aizawl Zoological Park-ah hian ramsa 300 chuang an awm mek a, heng zinga engemawzat chu bo tawhin tun thlengin hmuh let a la awm lo a, hetiang thil Sahuan-a a thlen tawpna a nih ngei theih nan theihtawp chhuah mek a nih thu leh, tunhnaia thil thleng avang hian Sahuan staff te chu duty hun insiamin a inchhawka tlaivar-a duty nghal a ni tih Deputy Conservator of Forests Aizawl Wildlife Division chuan a sawi bawk.