Chhinga Veng in dan lova sumdawng an dapchhuak

Chhinga Veng Local Council leh NGO chuan Inrinni khan an vengchhung-a dan lova sumdawng dapchhuah hnatlang nei chhunzawmin dan lova sumdawng mi 7 an man belh.

Chhinga Veng Local Council leh Joint NGO hian thla liamta October ni 18 atang khan dan lova an Veng a awm dapchhuah beihpui an lo thlak tawh a, hemi tuma an man te hi October thla ralhmaa an Veng chhuahsan tur leh inchingfel tura thu pein heng zinga mi pathum ten an dawr an titawp a, pakhatin dawr a lo la hawn avangin Tala-a kalhsak a ni bawk a. Inrinni-a hnatlangah hian dan lova sumdawng mi 7 an man chhuah belh hi November ni 15, 2025 hmaa inthiarfihlim tura tih an ni. 

Akashvani News Aizawl zawhna chhangin Chhinga Veng Branch YMA President C Laldinsanga chuan dan lova sumdawng tih rehna tura an hmalakna vengchhung thlawpna an hmu tha tih sawiin, an Veng chhunga hnamdang sumdawngte chu State pawn lam atanga vai leh Myanmar atanga lo kal, pem lehkha nei lo te an ni a ti a, pem lehkha nei te erawh chu sumdawn an phalsak tih a sawi a ni.