Mizoram State Anti-Tobacco Day 2025-ah Tobacco Free Youth Campaign 3.0 hawn a ni

Mizoram State Anti-Tobacco Day vawi 12-na chu nimin khan Mizoram hmun hrang hrangah hman niin hemi rual hian ‘Tobacco Free Youth Campaign 3.0’ hawnna neih nghal a ni.

Mizoram State Anti-Tobacco Day vawi 12-na leh ‘Tobacco Free Youth Campaign 3.0’ hawnna hi Ser-chhip-ah chuan nimin khan Govt. Serchhip College-ah neih niin Govt. Serchhip College Drug Awareness Club-a Asst. Professor Dr. Lalrosanga chuan a kaihruai a, he hun hi Serchhip Addl. DC Lalrinzuala chuan khuallian nia hmanpuiin zirlai kalkhawmte chu zuk leh hmuam, Vaihhlo leh a khaihhnawih thil chi hrang hrang laka fihlim tura chahin, Tobacco Free Youth Campaign 3.0 chu a khuhhawng nghal a ni.

National Tobacco Control Program (NTCP) Serchhip District leh Govt. Serchhip College Drug Awareness Club te tangkawpin an buatsaih he hunah hian NTCP-a Social Worker C. Lalrempuia chuan kumin chhunga an hmalakna hrang hrang tarlangin, Tobacco Free Youth Campaign 3.0 hnuaia an hmalak dan tur ruahman lawk te a tarlang a. National Tobacco Control Program (NTCP) District Nodal Officer Dr. Lallawmkimi Chhakchhuak chuan kumin-a he ni thupui, ‘Tobacco free life style’ tih hmanga thu sawiin, he huna tel te hian NTCP-a Counsellor Maria VL. Neihhlui kaihhruaina hnuaiah zuk leh hmuam laka inthiarfihlim turin thutiam an chhamrual a, DEO Lalramnghaka Kawlni chuan lawmthu sawiin hun a hmang bawk a ni.

Mizoram State Anti-Tobacco Day 2025 leh Tobacco-Free Youth Campaign 3.0 pual hian Aizawl-ahc huan Directorate of Health&Medical Education Auditorium-ah Health Minister Lalrinpuii hovin hun hman a ni a, Tobacco-Free Youth Campaign 3.0 in a tum ber chu Mizorama khuate leh zirna In a tam thei ang ber vaihlo leh a kaihhnawih awm lohna hmuna siam tura hmalak a ni tih Healt Minister chuan sawiin, Department zirchiannain a tarlan danin ruihhlo ngawlvei tam ber chu zuk leh hmuam atanga bul tan an nih thu a sawi a. Middle School naupangte zingah pawh zuk leh hmuam leh damdawi tite hial pawh an awm tih sawiin, Zuk leh hmuam tih chuan rilru leh taksa hriselna a nghawng mai bakah kan chhehvel boruak leh mimal leh chhungkaw sum enkawl dan thlengin, nitin nun a nghawng tak zet tih a sawi a. Anti-Tobacco Day pualin vaihlo leh a kaihhnawih do kawngah chuan mahni zawn theuhva theihtawp chhuah zel turin a chah bawk.