Serchhip District-a khaw pathum-ah ‘Legal Aid Clinic’ hawn a ni
Gauhati High Court Judge leh Mizoram State Legal Services Authority (MSLSA)-a Executive Chairman Justice Nelson Sailo hian nimin khan Serchhip District hi rawn tlawhin chawhma lamah Thenzawl-ah ‘Legal Aid Clinic’ hi hawng hmasa berin hemi hnu hian Chhiahtlang khua leh Chhingchhip khua ah te a hawng leh a, heng Legal Aid Clinic hawnna hunah hian Justice Nelson Sailo chuan dan chu hriat tawk a awm thei lo tih sawiin, nitin-a inzir thar reng ngai kan nih thu a sawi a. Mitinin kan chanvo kan chan ngei theih nan Legal Aid Clinic hi buatsaih a ni tih sawiin, mipui mimirin dan leh hrai kaihhnawih thurawn an lak theihna tur leh harsatna leh mamawhna an neih apianga an pan theih tura Legal Aid Clinic chu hawn a nih thu a sawi a. Hetiang lama puih ngai tupawh inthlahrung lova engtik hunah pawh Legal Aid Clinic te hi pan thin tur leh khawtlang hruaituten tangkai takin hmang thin se a duh thu a sawi a. Heng Legal Aid Clinic te hi Para Legal Volunteer ten an vil dawn thu pawh sawiin, amaherawhchu anmahni ah ringawtah innghat mai lovin khawtlang hruaitute ten theihtawp an chhuahpui chuan khaw nuam an ni ngei ang tih a sawi bawk.
Mizoram SLSA-a Member Secretary Vincent Lalrokima MJS pawhin Legal Aid Clinic chu mipuite tan malsawmna a nih ngei an beisei thu leh tangkaina tam tak a neih dawn thu a sawi a. Mizoram sawrkar in Mizoram State Legal Services Authority bakah District tinah District Level Services Authority dinin, eng hawi zawng pawha tanpui ngaite tanpui tura theihtawp chhuah chu an dinchhan a nih thu leh mipuite tan theih-tawp an chhuah thu sawiin, khawtlang hruaitute nen thawkho an nih thu leh Legal Aid Clinic hi tu tan pawha pan theih a ni tih mipui ten lo hria se a duh thu a sawi bawk a ni.
Justice Nelson Sailo hian heng khaw pathum te hmanttangkai atan Silpauline leh Emergency light thahnem tak chu Village Council te hnenah a hlan nghal bawk a. Mizoram State Legal Services Authority Member Secretary Vincent Lalrokima leh Serchhip District Legal Service-a Secretary Josangzeli Tlau ten High Cout Judge hi an tawiawm a ni.