PTS Thenzawl-a Training 7th Batch Asst. Sub-Inspector (Ministerial) ten Passing Out Parade) an nei

Thenzawl-a Police Training School (PTS)-a Training nei 7th Batch Assistant Sub-Inspector (Ministerial) 2025 te chuan nimin khan an Training zofelin Passing Out Parade (POP) an nei.
7th Batch Assistant Sub-Inspector (Ministerial), 2025 trainee mi 18 te Passing Out Parade (POP) hun hi Mizoram Police-a IG (Training) Meghna Yadav IPS chuan khuallian nia hmanpuiin trainee te chu an training hlawhtling taka an zo thei chu a lawmpui thu a sawi a, an hna thawhna ah discipline, inpekna leh dikna vawng tlat turin a chah a. Ministerial Officer te chu Police Organisation-a langtlang leh mawhphurhna lakna kawnga an pawimawhna a sawi lang bawk.

He hunah hian General Salute (Salaami Shastra) pek niin Passing Out Parade neih zui nghal a ni a, PTS Thenzawl-a Principal Lalthakima MPS chuan dikna leh rinawmna vawng chunga mahni hna theuh an thawhnaah an mawhphurhna hlenchhuak tura intiamna a neihtir bawk a. ASI (M) trainees te’n March past entirin, he hun hi Pipping Ceremony-in khar a ni a, Training chhuakte koki-ah an chhungten Arsi an bel sak a. Training chhunga tithate hnenah lawmman sem niin All Round Best lawmman chu ASI (M) Lalhunruata Fanai hnenah hlan niin Best in Indoor Subjects-ah ASI (M) Lalhunruata Fanai leh Best in Outdoor Training lawmman chu ASI (M) Jeremy Lalhminghlua Ralte te hnenah hlan an ni bawk.

Assistant Sub-Inspector (Ministerial) te tana Training hian thla 3 (chawlhkar 14) chhung awhin Police Department-a Ministerial hna thawhna tura an inbuatsaihna a ni a. ASI (M) Trainees te hian training khauh leh hautak tak neiin Indoor leh Outdoor lama training an nei kawp a. Outdoor training hi ni 61 chhung neiin kartawp leh Pisa chawlh-ah te pawh chawl ve lovin Training hi neih thin a ni. Physical Training (PT), Drill leh ralthuam (weapons) lam te pawh zirtir an ni a. Outdoor Training hi zing dar 5:00-ah PT-a tanin zan dar 9:00-ah an tawp thin a ni.

Indoor training-ah hian Ministerial hna thawhna tura pawimawh Subject 16 zirtir an ni a, nitin zing dar 10:00 atanga chhun dar 1:00 inkarah Class neihpui thin an ni a. Indoor-ah hian: New Criminal Laws, Criminal Minor Acts, Mizoram Police Manual, Mizoram Police Act, Central Civil Service Rules, Conduct leh Leave Rules, Pension leh Financial Rules, Treasury leh Audit procedures, Income Tax Rules, Medical Attendance Rules leh Provident Fund Regulations te an zir a ni bawk. He Indoor leh Outdoor training programme inbuk tawk tak in a tum chu Trainees te discipline, physical fitness leh an hnathawhna turah thiamna tak tak neih theihna tur a duan leh buatsaih a ni.

Police Training School Thenzawl-ah hian Basic Training bakah In-Service Training hrang hrang pre-promotion Course, Cadre Course leh Refresher Course hrang hrangte kalpui thin a ni.