NIRF Ranking-ah Mizoram a san laiin PG Index 2.0 Report-ah Mizoram in a tichhia
Education Minister Dr. Vanlalthlana chuan zirlaite chuan National Institutional Ranking Framework (NIRF) Ranking-ah Mizoram-a zirna In sang te dinhmun a san laiin Ministry of Education-in Performance Grading Index 2.0 Report a tlangzarhah Mizoram chu a tichhe berte zingah a tel thu a sawi.
Aizawl City College Joint Students' Union (ACCJSU) kum 25 tlin lawmna hun nimin-a Lal Thanhawla Auditorium, Aizawl-a neih khuallian nia a hmanpuina ah Education Minister Dr. Vanlalthlana chuan zirlai kalkhawmte chu kan ramin-a Human Capital kan neihte an nih thu hrilhin, zirna sang zawk lamah Mizoram chu che thain, tunhnaia National Institutional Ranking Framework (NIRF) Ranking-ah Mizoram University (MZU) leh Pachhunga University College (PUC)-te thleng sang mah se School Education lamah tunhnaia Ministry of Education-in Performance Grading Index 2.0 Report a tlangzarh ah Mizoram chu a tichhe berte zingah kan tel tih a sawi a. All India Service-a inziak tling kan neih lohna a rei tawh thu tarlangin, heng harsatna te leh zirlaite dawmkan dan tur zirchianga zirna siamtha turin NITI Aayog nen an indawr tih a sawi bawk.
Education Minister chuan zirlaite hamthatna atana sawrkarin hma a lak te tarlangin, kum tam tak luah theih loh NIT Mizoram Lengpui Campus chingfel turin cheng vbc .10 an pek tawh thu leh Forest Clearance nghah mek a nih thu te, Mizoram Engineering College-ah pawh Industry mila Syllabus neih an tum thu te, State University atana Registrar leh Vice Chancellor lakna tur Search Committee din chhoh a nih tur thu te a sawi a. An sawrkar hnuah College sakthatna tur PM-USHA leh SASCI atangin cheng vbc. 100 chuang an dawn tawh thu te, Aizawl-a College te insem tur cheng nuai 1000 vel an dawn thu leh College fee ennawn mek a nih thu te a sawi bawk.
Heng bakah hian a ngheta College Zir-tirtu mi 32 lak an nih tur thu pawh Minister chuan sawiin, ‘Qualified teacher’ chauh an lak thu leh an thawh hnua la qualified lo te chu ‘Show Cause Notice’ an pek thu a sawi a. School Education Department a chan hnuah a hriat chinah chuan Advertisement tel lova hna an la lak loh thu pawh sawiin, dik taka hna lak a nih avangin zirlaite chu lehkha zir tang tang tur leh an zir rah an seng theih tur thu a hrilh a. Zirlaite chuan an awmna hmun apianga an hman tangkai theih tur thiamna, ‘Metaskills’ an neih a ngaih thu sawiin, Artificial Intelligence (AI) hman dan tawk hriat a tul thu a sawi bawk.