‘Mizo Thurochun Thawnthu lawrkhawm’ Bu tlangzarh

District Institute of Education and Training (DIET) Serchhip ten ‘Mizo Thurochun Thawnthu lawrkhawm’ Bu an buatsaih chu nimin khan hman theih tura tlangzarh a ni.
DIET Serchhip te hian Mizo naupang ten kan Mizo thawnthu an hriat zel nan te, kan Hnam zia leh nunphung te an hriat thar nan leh thawnthu hmanga tawng (language) zirtir chu Mizo tawng inzirna atana thil tangkai tak nia hriain Mizo thawnthu chi hrang hrang dahkhawmna tur lehkhabu ‘Mizo Thurochun Thawnthu lawrkhawm’ tih hi an buatsaih a. He Lehkhabu hi nimin khan DIET Serchhip-ah Faculty Incharge, Elizabeth Lalrin-zuali chuan  tlangzarh a, he lehkhabu an puitlin theihna tura thawktute leh milem ziaktu PSTE  zirlai Lallianmawia te chungah lawmthu a sawi bawk.

Nimin-a tlangzarh tak ‘Mizo Thurochun Thawnthu lawrkhawm’ hi phek 100-a chhah niin Mizo thawnthu 18 dahkhawm a ni a, he lehkhabu hi Serchhip District chhunga Elementary School hrang hrangah a thlawna sem tur a ni ang.