Langtlang leh mawhphurhna la ngam sawrkar leh sawrkar hnathawk nih a tul - Bawrhsap

Serchhip District Bawrhsap Paul L. Khuma chuan mipui sawrkar tha nei turin langtlang leh mawhphurhna la ngam sawrkar leh sawrkar hnathawk nih a tul thu a sawi.
Ramchhunga ‘Right to Information Week 2025’ hman mek chu nimin khan Serchhip-ah pawh Serchhip DC Pisapui Hall-ah hman niin he hunah hian Serchhip Bawrhsap Paul L. Khuma chuan Right to Information (RTI) Act chungchang a bulthum atanga sawiin, British hunlaia Official Secret Act, 1923 an siam chu India-in zalenna a sual chhuah hnuah pawh kum tam tak an chhawm chhoh dan te; sawrkar dik leh tha a awm theihna tura khua leh tuite hnena information pekchhuah a tulzia hriaa he dan, RTI Act pianchhuahna tura kum tam tak a inthial dan te a sawi a. Mipui sawrkar tha nei turin langtlang leh mawhphurhna la ngam sawrkar leh sawrkar hnathawk nih a tul thu sawiin, “Heng zawng zawng pawtkhawmtu hi RTI Act a ni lo thei lo a ni,” a ti. RTI Week kan hmanna chhan chu a hmangtu mipuite leh sawrkar hnathawkte hriatzauna atan a nih thu pawh sawiin, mipuiin a hlutna leh a tangkaina an hriat a, an dikna chanvo hi a hun takah an hman thiam theihna tura inzirtirna hun a nih thu a sawi bawk.

Right to Information Week 2025 puala inkhawm Serchhip-a neih hi Serchhip Addl. DC leh State Public Information Officer (SPIO) Lalrinzuala chuan kaihruaiin Master Trainer pahnih - Dr. C/ Vanlalchhanhimi leh Dr/ Marilyn Lalruatkimi te chu Resource Person-ah hman an ni a. Anni hnen atang hian RTI nihphung te, mipui mimirin zawhna an zawh theih dan kalphung te, SPIO leh SAPIO te mawhphurhna leh hremna dan awm thei te an sawi a. Sawrkar hnathawk, RTI zawhna dawngte chuan hunbi tiam chhunga chhanna pek ngai pawimawh zia leh a zawttute pawhin zawhna pawimawh leh awmze nei zawh nachang an hriat a pawimawh thute an sawi a ni.

He hunah hian Serchhip-a sawrkar hnathawkte leh tlawmngai pawl hrang hrang aiawhte telin RTI chungchang zirhona an neih hnu hian zawhna leh chhanna hun hman a ni a, Serchhip DIPRO Lalnunmawii chuan lawmthu sawina neiin hun hnung a khar a ni.

RTI Act hi June 15, 2005 khan India Parliament chuan a pass a. Hemi kum vek October 12-ah Jammu & Kashmir tiam lohin India rampumah hman tan nghal niin RTI Act hman tan ni pual hian kumtin ‘RTI Week’ hi he Dan chungchanga hriat tur pawimawh inzzirtirna atan hman zui a ni ta a ni.