Kumin chhungin Mizoram-ah zawhna 6,572 zawt tawh

India khua leh tui tupawhin sawrkar thuneitute kawl information te dan hmanga a taka an neih theihna Right to Information Act, 2005 hmangin mipuiten kumin ah ‘Mizoram Online RTI’ kaltlangin Mizorama sawrkar Department, Office leh Board hrang hrang hnenah zawhna 6,572 an zawt tawh a; tun thla kal mekah ni 4 chhungin Online RTI-ah hian zawhna 96 a lut tawh.

    Mizoram Information Commission tarlan danin, RTI Act Second Schedule hnuaiah ram venhimna kaihhnawih thilte chu mipuiin information an dil theih zingah ngaihhnathiamna (exemption) pek an ni a. Exemption pek zingah hian Central sawrkar hnuaia Intelligence leh Security Organisation 22 an tel a, Mizoram sawrkar hnuaia Exemption pek zingah hian CID Special Branch, District Special Branch leh Narcotic Cell-te bakah thubuai chhuilai tibuai thei turte a tel a. Exemption pekte leh a thawktute hi eirukna kaihhnawih leh Human Right bawhchhiatna lam thilah chuan RTI Act hnuaiah hlahthlem an ni bik lo thung a ni. Mizoram Online RTI hi kum 2022 July thla khan hawn a ni a; kumin bikah January ni 1 atanga October ni 4, 2025 thleng khan Online RTI kaltlangin zawhna 6,572 a lut tawh a, tun thla kal mekah ni 4 chhungin zawhna 96 a lut tawh bawk.