Influenza natna leng mek lakah fimkhur turin chah

Tunlai hian India ramah Influenza natna a leng mek a, he natna hi inkaidarh theih a nih avangin mipuite chu fimkhur tura chah an ni.
Hemi chungchanga Health & Family Welfare Department, National Health Mission-a Integrated Disease Surveillance Programme (IDSP) thuchhuah chuan tunlai hian India ram hmun hrang hrang ah Influenza natna a len mek thu leh Mizoram chhungah pawh hmun hrang hrangah vei an awm tih hriat a nih thu tarlangin, Lunglei District-ah pawh School pahnih lai hri leng avang hian khar a lo ni tawh tih an tarlang a. He natna hi inkaidarh theih anih vangin mipuite an fimkhur nan an zawm turte an tarlang a ni.

Hr thuchhuah ah hian Natna lanchhuah dan tlangpui tarlangin, Khawsik, Luna, Taksa na, sil themthum, Ruhna leh Chau, Thawhah, Hritlang, Khuh, Hrawk na leh Naupang ah Kawthalo leh luak a awm thei bawk tih an tarlang a. He natna hi mihring leh mihring-ah inkaidarh theih niin khuh leh hahchhiau atang leh Kut a thil kan khawih atangin inkaichhawn theih a ni tih an tarlang. He natna laka fimkhur ngai zual zingah Raipuar, Nausen, Kum upa lam, Natna benvawn nei leh Hun rei tak chhung damdawi-a inenkawl ngai te telin; invenna atan Puipunna hmuna awm tam loh te; Mit, Ka leh Hnar te khawih loh tur a nih thu te; Midang nen kut leh kut in vawn/inchibai loh hram nise tih bakah Mahni rinthu a damdawi ei loh tur a nih thu an tarlang a. Khuh leh hahchhiau in hmui leh ka te inhup thin tur a nih thu te; Sahbawn-in kut fai taka sil thin tur a nih thu te; Thil tuiril in tam tur a nih thu leh Hritlang/khawsik kan neih chuan midang te hnaih lo a awm nise. loh theih loh anih pawhin Face Mask hman thin tur a ni tih an tarlang a. He hri kai zingah ni hnih khat hnu a hmasawn em em a awm loh a, thawk lama harsatna te chuan Doctor rawn vat tur a ni tih an tarlang bawk.