Handholding Scheme hnuaia MaidConnect Project kalpui tur chungchang sawihona neih a ni

Mizoram Youth Commission (MYC) chuan Handholding Scheme hnuaiah MaidConnect Project a kalpui dawn a, he Project hi kumthar atanga kalpui tum niin he hmalakna hnuaiah hian MYC Office-ah MaidConnect Cell din tura ruahman a ni bawk.

Mizoram Youth Commission (MYC)-in Handholding Scheme hnuaia a kalpui tur, MaidConnect Project chungchang sawihona hi nimin khan Aizawl-a MYC Conference Hall-ah neih a ni, he huna tarlan a nih danin MaidConnect Project hnuaiah hian Mizo thalaite, abikin mi In-a awm/awmpui/nula te an awmna tur mumal taka zawnpui an ni anga, an awmna turte nen pawh inremna mumal tak siam thin a ni ang. Hemi atan hian Training pek thin an ni dawn a, hlawh chungchang pawh fel taka bituk a ni ang. Employees State Insurance Scheme/ESI-ah ziahluh an ni anga, an awmna ten hlawh an pek atangin percent tlemte an pek sak ang a, damloh nikhuaah pawh chumi hmang chuan an inenkawl thei dawn a ni. Hei bakah hian Police Verification tih tir an ni vek bawk anga, hemi hmang hian harsatna leh buaina a awm thulhah pawh rang taka chhuichhuah theih a ni dawn a. Awmpui mamawh ten pawisa chawia zawn sak theite an dawr thin pawh Maid Connect hmang hian mumal taka khuahkhirh a ni ang a. Hei hi registration mumal tak nen a kalpui a, background check nen thlapa kalpui a ni dawn tih sawrkar thuchhuah chuan a tarlang a ni.

MaidConnect project hi kumthar atanga felfai taka kalpui tum anih avangin nimin-a sawihona hi neih a ni a, Project hi MYC in a kalpui hunah chuan MYC Office-ah hian Officer kaihhruaina hnuaiah MaidConnect Cell din a ni dawn a, he Cell hian registration, verification, training te an lo buaipui dawn a ni.

MYC-in Handholding Scheme hnuaia a kalpui tur MaidConnect Project chungchang sawihona hi MYC Chairman Malsawmzuala Ralte chuan kaihruaiin Mizoram State Commission for Women-a Chairperson C. Laldinpuii bakah Home LESDE, Social Welfare leh Women & Child Development Department-a thawktute leh MHIP hruaitute an tel a ni.