Gas harsa zui dawn niin a lang

Mizoram Indane Distributors Association (MIDA) chuan Krismas leh Kumthar-ah gas hnianghnar hmuh a beiseiawm loh tih an tarlang. Hemi chungchanga tunhnaia thuchhuah an siamah MIDA chuan eirawngbawlna gas harsat chhan sawiin, kumin June thla atanga tun thlengin rampumah eirawng-bawlna Gas a thleng tha lo tih an sawi a, hei hi NH. 306 huamchhung Sairang leh Kawnpui inkar kawng chhiat vang a nih thu an tarlang. Kawngpui hian chhiat lam a pan zel thu pawh tarlangin, tun din-hmunah LPG Truck-te hi ni 4/5 te an la thang thin a, kawngpui chhiat avang hian LPG truck an thang rei a, chu chuan LPG Bottling Plant lamah LPG truck indaihlohna a thlen thin tih an sawi a. Tunah hian mipuiah Gas indaih lohna, harsatna a thleng chho mek tih sawiin, heng te hi thuneitute hnenah an thlen tawh thu leh ngaihsak a hlawh lovin hma-sawnna a awm lo hle tih an sawi a, sawrkar chu kawng siamtha vat tura an ngen thu pawh an sawi bawk a ni.