END Minister in Vairengte Checkgate a tlawh

Excise & Narcotics Department changtu Minister Lalnghinglova Hmar chuan Inrinni khan Vairengte-a Excise Check Gate tlawhin Vairengte chu hmun danga Excise awmte aia langsar an nih avanga fimkhur leh taima zual turin a chah.

Vairengte-a Excise Check Gate a tlawhna ah hian END Minister chuan tunhnaiah Excise & Narcotics-a thawkte thahnemngaihna zarah ruihhlo man a pung a, Vairengte Check Gate a thawkte pawh an thawhrimna leh hmasawnna chu lawmawm a tih thu a sawi a. Sawrkarin Excise & Narcotics Department a ngaipawimawh tih sawiin, kum 2024 chhungin District thar pathum - Saitual, Khawzawl leh Hnahthial-ah te Excise Station hawn thar a nih thu a sawi a. Department chak lehzual nan post thar 12 siam niin thawktu indaihlohna phuhru turin Direct Recruitment hmangin mi 16 lak an ni tawh a, midang 33 lakna tur a kal mek bawk tih a sawi a. Ruihhlo do kawnga pawimawh tak motor thar 18 (LMV - 14 leh Two Wheeler 4) lei thar bakah LMV hman mek pathum chu Mizoram sawrkarin a pek thu a tarlang a ni.

END Minister chuan Police nen tangkawpa ‘Ruihhlo Do Beihpui’ kalpui mekah Excise & Narcotics Department chuan mawhphurhna lian leh pawimawh tak an neih thu pawh sawiin, “Sawrkarin min duhsak a, kawng hrang hrangin department min thuamchak a, chumi thungrul tur chuan tha zawka thawh a ngai a ni.” tiin Vairengte chu hmundanga Excise awmte aia langsar an nih avanga fimkhur leh taima zual turin a chah a ni.

Tun dinhmunah Excise & Narcotics Station, Vairengte-ah hian Inspector pakhat, Sub-Inspector pahnih, Head Constable pahnih, Wireless Operator pahnih leh Constable 11 an awm mek a ni.

Sports & Youth Services Department changtu Minister ni bawk Lalnghinglova Hmar hian Inrinni vek khan Kolasib Saidan-a Regional Sports Training Centre (RSTC) chu a hmunah tlawhin naupangte fuihna thu a sawi bakah thawktute nen hmalak ngaihna laite an sawiho a. RSTC, Kolasib-ah hian Minister hi Warden Zonunmawia leh Kolasib-a SYS Staff ten lo dawngsawngin RSTC, Saidan hi Sports & Youth Services Department hnuaia awm a ni a, mipa naupang kum 17 chin hnuailam tana Football zirna (residential academy) a ni a, DSYO leh Coach in an awmchilh a ni. Tun dinhmunah naupang 30 an awm mek a. Kumin May thla khan Bihar-a Khelo India Youth Games-ah Mizoram aiawha kalin Bronze Medal an la a. September, 2025-a Subroto U-17 Boys khelh zawh takah khan Semi Final an thleng bawk a ni.

Minister hian Kolasib District Football Association leh Reliance Foundation-in Kolasib District Stadium-a Naupang League an khelh mek pawh tlawhin naupangte fuihna thu sawiin, tun atanga zu leh ruihhlo tichhin lo tura thutlukna nghet siam turin a chah a ni.