Danglamna siam niin sawi

School Education Minister, Dr. Vanlalthlana chuan Zirna kalphung chu thawk leh khatah thlak thut theih thil ni lo mah se zawi muangin a tha zawngin danglamna an siam mek zel tih a sawi.

Hnahthial-a neih Mizo Students' Union (MSU) General Conference vawi 23-na chu Zirtawpni zan khan Palai Thlahna Inkhawm neiin he hun hi a hmanpuina ah School Education Minister Dr. Vanlalthlana chuan zirlai lehkha thiam tak tak ten an chanvo tur an chang lo thin chu a tawrhpui thu sawiin, chuvang chuan zirtirtu hna lakah pawh fair takin, Advertisement tel ngeiin qualified leh thiam tak tak chauh an lak tawh thin thu a sawi a. Zirtirtu lak turte pawh lehkha thiam ringawt ni lova zirlaite zirtir thiam an nih ngei theih nan an exam-na ah Practical Teaching an tih tel zel tawh thu sawiin, Dan ang tak leh fair takin Samagra Shiksha hnuaiah Zirtirtu, Instructor leh a dang dang mi 1700 chuang la tawhin chu mai bakah Casual Teacher 1400 chuang an lak tawh thu a sawi bawk.

Tunhnaiah College Zirtirtu tur mi 32 la turin an inbuatsaih mek thu pawh sawiin Education Minister chuan, Lunglei-a Engineering College lo sak tawh, hman tlak lohva dah chu nakum Academic Session-a hman theih turin tan an lak thu a sawi a. Chutah pawh chuan a thawktu tur post siam fel ni tawhin lak theih tura ruahmanna siam a nih tawh thu a sawi bawk a. Sawrkar Laipui lamin a rawn ngiat angin State University pangngai tak, Mizoram chhunga College zawng zawng rawn in-affiliate-na tur duan an tum thu a sawi a. Chuta zir tur course-te pawh siam fel tawh niin khawvel el phak zirna leh zirlai chher chhuah an tum thu a sawi a ni.

MSU General Conference vawi 23-na hian Casual Teacher te dinhmun (Jub Security) ennawn a, tun aia dinhmun tha zawka hlan an nih theih nana hmalak relin, Higher Secondary School leh College zirtirtu nghet tun aia zing zawka lak anih theih nan hmalak an rel bawk a. Mizoram Sawrkar hnuaia School zawng zawng te Grade System siam anih theih nan hmalak an rel bakah Mizoram Engineering College Lunglei chu anih ang tur taka a kal (function) vat theih nan hmalak an rel bawk. Heng bakah hian CESS atanga Education Sector in a chan tur ah Education Sector in a vaia a chan vek theih nan hmalak relin, Education Sector in a chan tur hi School Education leh Higher & Technical Education Department ten rualkhai taka an chan theih nana hmalak an rel a. FCAA chu zirchiana a tul anga hmalak te, Mizoram-a dan lova khaw din zawng zawng dapchhuah a, a tul anga hmalak leh MSU Dan bu a tul dan anga ennawn te an rel bawk.