Buangpui Branch YMA Golden Jubilee lawmna Chief Minister Lalduhoma hovin neih a ni

Serchhip Bialtu MLA leh Chief Minister Lalduhoma chuan nimin khan a Bial chhunga Buangpui Branch YMA kum 50 tlin lawmna chu khuallian niin a hmanpui.
Buangpui Community Hall-a Buangpui Branch YMA Golden Jubilee lawmna hunah hian Chief Minister Lalduhoma chuan Buangpui mipuite lawmpuina hlanin, Branch YMA lo kaihruai tawhtute chungah lawmthu a sawi bakah tuna kaihruai mektute chu hmathlir fel tak neia kaihruai zel turin a chah a. YMA chu pawl zahawm leh thianghlim, mi zawng zawng lenna a nih thu sawiin, “Village Council-te hi tha hle mah se party leh party inepna boruak keng chunga din an ni a. Inthenna (division) kha a nei nghal a. Kohhrante pawh hi a tha lutuk, nimahsela, Kohhran hrang inkarah indaidanna (division) a awmsa tlat a. YMA erawh chu mitin lenna, daidanna engmah nei ve lo. Mizo hnam huikhawmtu, Kristianna pen bosan si lova Zonun zemawi chhawmnungtu leh zirtirtu a ni,” a ti a. YMA chuan a dinna khua apiangah tihmakmawh a nei ve a neih ve thu pawh sawiin, “Thangtharte hnena Zonun zemawi zirtirna leh kaihhruaina hi a kalpui tur a ni a, tlawmngaihna te, aia upa zahna te, tanpui ngaite tanpuite hi kan chhawm nung zel tur a ni. Kan hnamzia, Culture leh Tradition vawnhim leh tihhmasawn kawngah tha kan thlah tur a ni lo. Kan tawng te, kan thu leh hla te, kan kutthemthiam thil te, kan hmun hlui te, kan history pawimawhte venhim hna a thawh a ngai bawk. Tin, khawtlang nun hi kan ngaihthah thiang lo. Infrastructure leh Technology lamah te, sum leh pai lamah te sang chho zel mah ila thangtharte nun a tlakchhiat zel si chuan kan hnam hi zuihral mai ang tih a hlauhawm a. YMA hian a venghim tur a ni,” a ti bawk.

Nimin-a Buangpui Branch YMA Golden Jubilee lawmna hun hi Branch YMA President H. Lalbiaksanga chuan kaihruaiin Secretary Lalngurliana hnen atangin Report ngaihthlak a ni bawk a, Khual zahawm nia he hun hmanpuitu Central YMA President Lalhmachhuana pawhin thu a sawi bawk a ni.

Kum 1800 AD velah khan Buangpui khua velah hian Hmar Buangpui hote an lo cheng tawh nia hriat a ni a, an hmun hming leh sulhnute pawh hriat leh hmuh theihin an la awm a. Tuna Buangpui erawh hi chu Thenzawl lal Lalngurchhina’n kum 1932-a Aizawl Bawrhsap phalna laa a din a ni a. Rambuai-ah khan Thenzawl-ah sawikhawm an ni leh a, kum 1972-ah Bawk khawhin an kir leh a, kum 1975-ah YMA an din ta a ni. Tunah hian Buangpui khua ah hian In 114 awmin mihring 518 an cheng mek a, YMA Member 358 an awm bawk a ni.