AI-Bhashini App buatsaih mek

Tunlai khawvel thiamna sang zawk hmanga Mizo tawng leh Hindi tawng te, Mizo tawng leh Sap tawngte lehlin zung zung theihna, Artificial Intelligence, AI-Bhashini App chu buatsaih mek a ni.

Mizoram Hindi Training College (MHTC) kum 50 tlin lawmna nimin-a MHTC Auditorium, Durtlang North-a neih a hmanpuina ah Higher & Technical Education Department Minister Dr. Vanlal-thlana chuan Sawrkarin tunlai khawvel thiamna sang zawk hmanga Mizo tawng leh Hindi tawng te, Mizo tawng leh Sap tawngte lehlin zung zung theihna, Artificial Intelligence, AI-Bhashini App a buatsaih mek thu sawiin, nakum kum laihawl velah chuan a hman theih tawh a beisei thu leh chungte chu zirlai ten tangkai lehzuala an hman theih nan zirna ah senglut turin a chah a. Thingtlang lamah zirna tih hmasawn a ngaih nasat thu sawiin, zirtirtu indaihlohna awm thinte tihrem a nih theih nan sawrkar in hma a lak reng thu a sawi a; Aizawl khawpuia zirtirtu inbengberek nasa lutuk leh thingtlang lama zirtirtu indaihlohna nasa takte siamrem tura hmalakna kal mekah, zirtirtu thenkhat hnen atangin mi lian leh thil tithei zawkte puna, insawn lo tura insawipui leh nawrnate a awm thin thu leh hetiang thil hi ti lo tura a duh thu a sawi a, ram leh hnam tana tha thei ang ber turin sawrkar chuan huaisen taka hma a lak zel tur thu sawiin, mipuite hriatthiamna leh tawiawmna a sawm bawk.

Mizoram Hindi Training College hi kum 1975 khan Mizoram Sawrkar leh Central Institute of Hindi, Agra te tangkawpin an din a ni a, India hmarchhaka Hindi Medium-a Zirtirtu training-na hmun awmchhun niin National Council for Teachers Education (NCTE) pawmpui an ni a. Tun dinhmunah Course pathum - Hindi Shiksha Parangat (B.Ed); Hindi Shikshan Praveen (D.El.Ed) leh Hindi Shikshan Kaushal te kal pui mekin zirlai 100 vel an awm mek a. Minister hian Hindi tawnga ziak lehkhabu 15,000 chuang awmna leh tunlai thiamna hmanga thuam, New Age Learning Centre and Fully Automated Library a hawng nghal a ni.