Mizoram-a AIIMS din tura Union Minister ngenin Tar Pension dawng thei tipung turin ngen bawk

Health and Family Welfare Minister Lalrinpuii chuan India ram State hrang hranga Doctor zirna In tha leh damdawi In lian awmna, AIIMS chu Mizorama din ve ngei turin Union Health Minister hnenah ngenna a thlen.

Health and Family Welfare Minister Lalrinpuii leh Union Health Minister JP Nadda te hi niminpiah khan Delhi-ah inkawmin Health Minister Lalrinpuii chuan Mizoram dinhmun hrilhin, ziak leh chhiar thiam tamna ber State leh State ralmuang ber kan ni chungin kan State-in Central Sawrkar zirna In lian - IIT te, IIM te kan neih ve loh thu a hrilh a. India ram State hrang hranga Doctor zirna In tha leh damdawi In lian awmna AIIMS tal chu Mizoram-a din ve ngei turin a ngen a. Central Sawrkar hian kum 2006 atang khan India ram hmun 22-ah AIIMS (All India Institute of Medical Sciences) thar din turin hma a la tawh a, tunah chuan heng AIIMS 22-te hi an function hlawhtling deuh vek tawh a. Chuvangin heng AIIMS thar dinna Scheme - Pradhan Mantri Swasthya Suraksha Yojana (PMSSY) chu tuaithar a, AIIMS pawh Mizoram-a din ve ngei turin Union Health Minister hi a ngen a ni.

Union Health Minister JP. Nadda chuan Mizoram Health Minister dilna thlen chu tha taka lo dawngsawngin, an lo zirchian tur thu leh AIIMS hawn a nih ngei theihna atan hma a lo lak tur thu a sawi a. Mizoram Governor, Gen. Dr. Vijay Kumar Singh-te nen pawh inthiantha tak an nih thu sawiin, a theih dan dana hmasawnna kawnga thawhho a duh thu a sawi a ni.

Social Welfare Department changtu ni bawk Lalrinpuii chuan chuan Union Minister for Women & Child Development, Annpurna Devi chu niminpiah vek khan a Office-ah hmu bawkin Women & Child Department hmalakna tur hrang hrangte an sawidun a, hemi rual hian Women Helpline sum release tlai chungchang pawh lo enzui a tum thu a sawi bawk.

Rural Development changtu Minister chu a zinlai a nih avangin RD Secretary Shailendra Kumar Singh pawh Social Welfare Minister Lalrinpuii chuan hmu nghalin Tar Pension kan tih mai chungchang a sawipui bawk a. Mizoram-ah kum upa, Tar Pension dawng thei, dawng si lo an tam thu hrilhin, Mizoram allotment chu tipung turin a ngen a. Hei bakah hian Central Sawrkarin mi pakhat tana Tar Pension, Widow Pension leh Disability Pension te a pekna rate chu a beitham em avangin tihpun dan kawng zawnpui turin a ngen nghal bawk a. Hemi chungchangah hian Shailendra Kumar chuan Minister thu thlente chu tha taka lo dawngsawngin, Tar Pension allotment tihpun leh a rate tihsan chu Union Cabinet pawmpui ngai thil anih avangin theihtawp chhuah an lo tum tur thu a hrilh a ni.