Thenzawl Peace City Lawmna Inkhawm neih a ni

‘He khawpui hi Aizawl sawn tumna a ni lo’ - Chief Minister

Chief Minister leh Serchhip Bialtu MLA, Lalduhoma chuan Mizoram in khawpui mawi leh changkang tak kan neih ve theih nan khawpui thar din an tum thu sawiin, “He khawpui hi Aizawl sawn tumna a ni lova, chutiang zawngin kan sawi ngai lo,” a ti a. Prime Minister in Peace City lungphum a phum theih an beisei mek thu a sawi bawk.

Thenzawl-a Village Council hrang hrang, NGO, leh khawtlang mipui tangrual chuan nimin khan Thenzawl Bazar Veng-a Joint YMA Hall-ah ‘Thenzawl Peace City Lawmna Inkhawm’ buatsaihin he hun hi Chief Minister Lalduhoma chuan khuallian niin a hmanpui a. Chief Minister chuan kan ram hian khawpui changkang leh tunlai, fel taka duan sa kan mamawh ve tawh tih sawiin, “Thenzawl hi chutiang din nan chuan a rem hle,” a ti a. “Chief Minister ka nih hnuah Prime Minister nena kan inhmuh tum hnihnaah khan Pu Narendra Modi hian ka nunkawng te min zawt a, Pi Indira Gandhi nena kan thawh dun dan te, IPS hna ka bansan chhan te, MP zinga Anti-Defection Law hmanga paih hmasak ber ka nih chhan te chu Mizoram buaina a lo reh a, muanna a lo awm theih nana ka thiam ang anga ka beih vena vang a nih thute ka hrilh ve a ni,” a ti a. “A hnenah hian, ‘Hei, Mizoram in remna kan nei ta a, India rama inremna hlawhtling ber zinga mi niin, State ralmuang ber kan lo ni ta a. Planned City kan nei bawk si lova, mipui nuai sawm chen theihna tur Peace City min pe rawh’ tiin ka dil ta a ni,” a ti. “He khawpui hi Aizawl sawn tumna a ni lova, chutiang zawngin kan sawi ngai lo, Mizoram in khawpui mawi leh changkang tak kan neih ve theih nan khawpui thar din kan tum zawk a, Thenzawl tan bik pawh a ni lova, Mizoram tan a ni,” a ti a. Hemi atan hian Master Plan siamna chauh min la pek thu leh a taka hmalakna tur hi an la ngaihtuah zel ang tih a sawi a, “15th Finance Commission sum chuang bang, Prime Minister kuta awm mek chu dil kan rilruk mek,” a ti bawk.

Chief Minister chuan tun thla ni 13-ah Sairang Rel Station chu Prime Minister-in a rawn hawng dawn tih pawh sawiin, “Peace City lungphum pawh a rawn phun theih kan beisei mek. Rel kawng hian Thenzawl Peace City hi thleng phei thuai se kan duh avangin hma kan la mek bawk,” tiin Thenzawl Peace City tobul leh hmachhawpte a tarlang a. A taka an thawh hunah insenghawi a la tul nasa dawn a, mipuiten inhawng taka an lo dawnsawn a ngai dawn tih sawiin, mipuite inbuatsaih turin a chah bawk a ni.

Thenzawl Peace City lawmna inkhawm-ah hian Khualzahawm leh Supply Minister B. Lalchhanzova pawhin Thenzawl chu khawpui a la nih tur thu mi tam takin an lo sawi tawh thin tih sawiin, “Chu hun chu a takin a lo thleng dawn hnai ta a. Mipuite kan hlimin kan lawm hle,” a ti a. Thenzawl hi Bengkhuaia lal ram chhunga awm niin khawper a lo siam thinna a ni. Mary Winchester chung thu-a British sawrkar aiawh TH Lewin nena Sa-Ui an tanna pawh tuna Thenzawl Thlan-mual-ah hian a ni, Peace City dinna hmun atan pawh a inhmeh hle a ni,” a ti.

Nimin-a he hun hman hi Thenzawl Joint VC Chairman B. Lalrinliana chuan kaihruaiin Vantawng Group YMA President C. Lalnunthara chuan Thenzawl mipui aiawhin lawmthu a sawi a. “Kan Bialtu MLA leh Chief Minister-in Thenzawl-a khawpui changkang, Peace City din tura hma a lakna ah hian kan lawm a, kan phur a, mipuiten a lawmna hun neih hi kan chak a, thukhat vuain he hun hi kan buatsaih ta a ni,” a ti bawk.

Sawrkar thuchhuah tarlan danin Central sawrkar chuan Thenzawl-a mipui nuai 10 vel khawsak theihna tur khawpui changkang, KM 108 thuta zau Master Plan siam a rawn phalsak a, Master Plan siamna tur hi cheng vbc. 10 rawn pein Master Plan siam hna hi chak taka bawhzui nghal a ni a. July ni 22 khan Request for Proposal for selection of Consultant chu tihchhuah a ni tawh bawk a ni.