Ranvulh a eizawng duh tam tak an la awm thu Chief Minister in a sawi

Chief Minister Lalduhoma chuan mipui zingah ranvulh a eizawng duh kan la tam thu sawiin, Handholding Scheme Pilot Phase-ah pawh Loan Component leh CM Special Package-ah ranvulh lama hmalak dil tam tak an la awm thu a sawi.
Nimin-a Thenzawl Auditorium-ah Mithun Day vawi 3-na leh National Seminar on Integrated Mithun Farming puala Inkhawm khuallian ni a a hmanpuina ah Chief Minister Lalduhoma chuan Mizoram-a 3rd National Mithun Day leh National Seminar buatsaih a ni chu lawmawm a tih thu a sawi a. Agriculture & Allied Sector-a kan thawhchhuah zawng zawng zaa 23 vel chu AH & Vety lam atanga hmuh a ni tih sawiin, “Chutihlaiin kum khat chhungin cheng vbc. 630 man vel sa kan eiral a, chung zinga cheng vbc. 40 man vel hi State pawn atanga kan lakluh an la ni. Hei hian sa tharchhuah lama tan lak a la tulzia leh ka ranvulhtute tihchak deuh deuh a tulzia a tilang a. Mipui zingah pawh ranvulh a eizawng duh hi kan la tam hle,” a ti a. “Handholding Scheme Pilot Phase-ah pawh khan Loan Component-ah mi 3,647 leh CM Special Package-ah mi 13,019 te chuan ranvulh lama hmalak an rawn dil a ni,” tiin Mizoram chu ranvulhna atana ram tha ni mah se a vulh dan thiamna lamah tan lakna tur tam tak kan la nei thung a. Training tam zawk neih leh hmanraw tha zawk chhawp kawngah te hmasawnna tur kan la ngah hle a ni, a ti bawk.

Chief Minister chuan Sial vulh chu North East State mipui tam takte nunphung nen an inzawm tlat leh Mizo hnam nunah pawh dinhmun pawimawh tak luahtu, hausakna tehkhawng atana hman thin a nih thu a sawi a. “Vawiin thlengin chhungkaw tam takin eizawnna pengah Sial vulh an la kalpui a, khaw 41 velah kan uar zual. Sial hlutna hi a tlahniam thei lova, kan eizawnna kawngah dinhmun pawimawh tak a chang zui zel a ni,” a ti a. North Eastern Council (NEC) tanpuiin Mithun Multiplication Centre chu Lungkawlh-ah siam a nih thu leh Rashtriya Gokul Mission hmangin Mithun Breed Development & Conservation Centre chu Thenzawl-ah siam a ni bawk tih sawiin, hengte hi an tangkai hle dawn tih a sawi bawk a. Sial bikah hian Nuclues Station te, Scientific Breeding Centre te kan la mamawh thu leh NCR Mithun lamin hemi kawngah hian min tanpui theih an beisei tih sawiin, “Mi tam takin Kel vulh an uar tan a, Kel vulh lamah hian tawnhriat kan la ngah loh avangin ICAR-CIRG tanpuina hi kan la mamawh tual tual dawn a ni,” tiin ICAR nena thawhhona tha neih zel a tul thu pawh a tarlang bawk.

Mithun Day lawmnaah hian AH&Vety Minister C. Lalsawivunga leh Arunachal Pradesh Agriculture & Allied Minister Gabriel D. Wangsu te chu khual zahawm niin Dr. Raghavendra Bhatta, DDG (AS), ICAR, New Delhi chu Special Guest a ni a. He hunah hian sawrkar mi pawimawh hrang hrangte pawh telin chawhnu lamah ‘National Seminar on Integrated Mithun, Goat, Poultry & Pig Farming/ neih zui a ni.