Silk Pangang khawi nan Mizoram duhthusam tih sawi
Central Silk Board Scientist Team te hian nimin khan Thenzawl-a Muga Silkworm Seed siamna hmun tur chu tlawhin an endik a, a hmunhma leh Muga Pangang chaw, Bul thing te tha an tih thu sawiin, Mizoram chu Muga Silkworm khawina atan duhthusam a nih thu leh hun lo kal zel turah Mizoram-a theihna tam tak awm te chu tangkai lehzuala hman anih theih nan theihtawp an chhuah tur thu an sawi a ni.
Central Silk Board. Ministry of Textiles. leh Mizoram sawrkar-a Department of Sericulture te tangkawp hmalaknain August 19 leh 20 khan Tualcheng, Khawzawl leh Thenzawl-a nipui laia Muga pangang khawi hmalakna neih mek chu Joint Supervision neiin enfiah a lo ni tawh a, tun tuma rawn enfiahtu Central Silk Board Scientist Team te hi Dr. M. Maheswari, Director, MESSO chuan kaihruaiin Mizoram sawrkar Sericulture Department-a Deputy Director B. Lalchhuana leh District Sericulture Office-a thawktu ten an tawiawm a ni.