Mizoram-a Jail-ah tang 1496 an awm mek
Sawrkar chhinchhiahna atanga a lan danin tun dinhmunah hian Mizoram-ah Jail 11 awm mekin heng zingah hian mi 68 tan theihna tura ruahman District Jail, Saitual chu hman a ni lo a, Jail hrang hrangah hian tang an tamin Mizoram-a Jail lian ber Central Jail, Aizawl-ah chuan tang mi 934 an awm mek a, he Jail-a tang thei zat tura chhut chu mi 480 an ni thung a, he Jail-a tang te hi Mipa vek an ni. Central Women Jail pawh mi 96 tan theihna tura ruahman a nih laiin tang mi 159 zet an awm bawk a ni. District Jail tam takah pawh tang thei bituk zat aia tam an tang a, Aizawl District Jail chu mi 90 tan theihna a nih laiin tang mi 140 an awm a, mi 109 tan theihna Lunglei District Jail-ah tang mi 151 awmin mi 105 tan theihna tura ruahman Champhai District Jail-ah mi 189 an tang a ni.
Hethlai hian mi 92 tan theihna Siaha District Jail-ah tang mi 59 an tang mek a, mi 134 tan theihna Kolasib District Jail-ah mi tang mi 99 awmin mi 98 tan theihna Lawngtlai District Jail-ah mi 26 an tang mek bawk a. Mi 128 tan theihna Serchhip District Jail-ah tang mi 90 awm mekin mi 96 tan theihna Mamit District Jail-ah tang 84 an awm bawk a ni.
Mizoram-a Jail tang mek zinga 1259 te chu thubuai ngaihtuah lai niin thiamloh chantir 601 bakah damchhunga tang tura chhungthu rel 56 an awm a, heng te hi mipa vek an ni a, tang ten an hruai avanga Jail-a awm naupang 14 an awm bawk.
Home Department chhinchhiah danin kum thum kalta, kum 2023 atanga 2025 chhung khan Mizoram-ah tang tlanchhuak mi 52 awmin heng te hi kum 2023-ah mi 29, kum 2024-ah mi 13 leh kum kal mek 2025-ah mi 10 an ni a. Tang tlanchhuak zawng zawng hi an vaiin mi 52 an ni a, chung zinga mi 29-te chu man an ni tawh a, tun thlenga la man loh mi 23 an la awm bawk a. Mizoram-a Jail thenkhat chu cheithat hna thawh mek a ni bawk.
.jpeg)
.jfif)
Comments
Post a Comment
I ngaihdan i sawi hian mipui ngaihdan i tarlang a ni!