Session neih zawh taka FCAA Resolution bukna ah remti lo an awm loh thu Speaker in a sawi
Mizoram Legislative Assembly Speaker Lalbiakzama chuan, MNF sawrkar lai khan Forest Conservation (Amendment) Act, 2023 duh lohna chu House (Legislature)-ah pass nimah se, sawrkar (executive) hmalakna a awm loh thu sawiin, Assembly Session neih zawh takah FCAA 2023 resolution bûk a nih khan remti lo an awm loh thu a sawi.
Nimin-a a Pisa-a thuthar thehdarhtute a kawmna ah Speaker Lalbiakzama chuan India ramah sawrkar ruangam din turin Dan siamtu (Legislature), Dan siamte kengkawha hmalatu (Executive) leh thubuai chingfeltu (Judiciary) a awm thu sawiin, “Sawrkar hmasaa Assembly House in FCAA 2023 dodalna a pass kha Rule 137 of the 'Rules of Procedures and Conduct of Business' in a phût angin House-a thurel hriattirna (Legislature information) chu Mizoram sawrkara Chief Secretary hnenah pek a ni a, Lok Sabha-ah pawh pek a ni,” a ti a. “Legislature lamin Chief Secretary, Govt. of Mizoram-a a hriattir khan Mizoram sawrkarin a tih tur a intan chiah a. Sawrkar kalta khan hemi piahlam hi a hmalakna hriat a ni lo. Hei hi Chief Minister Pu Lalduhoma’n sawrkar kalta khan hma a lo la lo a tih lai kha a ni,” a ti a. FCAA 2023 duh lohna pass tawh chu Executive hmalak chhunzawm tur a nih thu sawiin, “Zawhna awm thei a nih avangin ka lo zirchiang tawh a, sawrkar hmasa khan FCAA 2023 duh lohna resolution hi August 22, 2023 khan House-ah adopt a ni a, Chief Secretary atangin September 12, 2023 khan he file hi EFCC Secretariat-ah put-up a ni. Minister-ah September 15, 2023-ah a lut a, Minister-a a awm vang vang hnuah November 29, 2023 khan Secretary-ah a lêt leh ringawt,” a ti a. MNF sawrkar laia FCAA 2023 duh lohna lehkha pechhuaktu chu Mizoram Legislative Assembly tih ve ve a nih avangin danin a phut anga Legislature information chauh a nih thu leh Legislature information chu Mizoram sawrkar (Executive) hmalakna nen sawipawlh chi a nih loh thu a sawi a ni.
Assembly House-ah Member ten an thurel reng rengte thlir dan hrang hrangin an sawiho (debate) thin thu pawh Speaker chuan sawiin, “Chumi hnuah chuan House ngaihdan lak a ni thin. Member te hnenah remti-in ‘Remti’ ti ula, rem tilo in ‘Rem ti lo’ ti ula tiin Speaker/Chairman ten an ngaihdan an la thin a. Hetia ngaihdan lak a nih lai a ‘Rem ti lo’ an awmloh chuan lungrual taka pass-a ngaih a ni thin. Tun tuma FCAA, 2023 adopt chungchangah khan Remti ka zawt a – remti an ti a, Rem ti lo in awm chuan ‘Rem ti lo’ ti rawh u ka tih leh khan rem ti lo tumah an awm lo. Chu-vangin kha Resolution kha lungrual taka pass zinga ngaih a ni,” a ti bawk.
FCAA, 2023 Resolution inpuahchahna leh inzirna hun awm lo nia sawi chungchang pawh Speaker chuan sawifiahin, “FCAA, 2023 Draft Resolution copy hi Session tan hma ni 7-ah Bulettin Part-II, No.101, dt. 19.08.2025 hmangin August 20, 2025 (Wednesday)-ah hard copy-in MLA te an In-ah pek vek an ni a, Mizoram Assembly website-ah pawh dah a ni nghal bawk. Session neih hmain kar (week) a tla a, hemi chhung hian a duh tan chuan inpuah-chah leh inzir hman tura ngaih an ni. An lo inpuahchah lo emaw, an lo inzir lo a nih chuan memberte mawh-phurhna zawk a ni ang,” a ti a. Session-a Resolution lut reng reng te chu a Resolution content bak Act leh Rules-te member te hnenah pek an ni kher lo tih pawh sawiin, “A relavent Act leh Rules an hre duh a; an zir duh a nih chuan tunhma pawhin member thenkhatten Library-ah an rawn ngaihven mai thin,” a ti bawk.
Hei bakah hian Speaker chuan Session neih dawn hma ni-ah a tuk a business turte member tin hnenah inpek thin a nih thu pawh sawiin, “August 27, 2025-a neih tur hi a hma ni August 26, 2025, 5:40 pm-ah Mizoram Legislative Assembly website-ah dah a ni a. Tin, MLA zawng zawng awmna Whatsapp Group-ah August 26, 2025, 5:40 pm-ah post a ni bawk,” tiin List of Business dawng har nia sawi awm chungchang a sawifiah bawk.