MUHCS chu hlawhtling taka kalpui a nih zel thu leh chhawr tangkai tam tak an awm thu sawi

Health & Family Welfare Minister Lalrinpuii chuan Mizoram Universal Health Care Scheme (MUHCS) chu hlawhtling taka kalpui a nih zel thu leh chhawr tangkai tam tak an awm tawh thu a sawi.

Mizoram State Healthcare Society (MSHCS) Official Website - mshcs.mizoram.gov.in tlangzarhna hun nimin-a SAD Conference Hall-II, Aizawl-a neih a hmanpuina ah Health Minister Lalrinpuii chuan MUHCS chu hlawhtling taka kalpui a nih zel thu leh chhawr tangkai tam tak an awm tawh thu sawiin, a hlawhtlin theih nana theihtawp chhuahtute hnenah lawmthu a sawi bawk a. Cashless System hman a nih avangin chhungkaw tam tak phurrit a chhawk thu leh he Scheme zawmtu, Empanelled Hospital pawh an awm ve nual tawh thu a sawi a. Chumi a nih avang chuan mipuite leh sawrkar hnathawkte pawh Empanelled Hospital-ah zel in admit turin a chah a ni. Health Minister chuan MUHCS hnuaiah hian State pawna inenkawl turte tan Medical Board paltlang tul tawh mah se refer kawngah harsatna a awm dawn loh thu leh thil mumal taka kalpui duhna vang zawk a nih thu a sawi a. Emergency Case-ah phei chuan awlsam taka kalpui a nih theih dan tur ngaihtuah zel a nih tur thu a sawi bawk a. Website tlangzarh tak chu mipuite harsatna tam tak chingfeltu a nih ngei a beisei thu a sawi bawk.

He hunah hian MSHCS-a CEO Dr. Lalhriatzuali Ralte chuan Mizoram Universal Health Care Scheme (MUHCS) hman tan a nih atanga tun thlenga an dinhmun pawimawh zual tarlangin, April ni 1, 2025 atanga tun thlengin Mizoram chhungah Empanelled Private Hospital sawm leh pakhat (11) leh Private Day Care Centres pathum (3) an awm thu a tarlang a. Mizoram pawnah Empanelled Hospital sawmhnih leh panga (25) awmin, Deemed Empanelled Hospital sawm leh pathum (13) an awm bawk. MUHCS hnuaiah hian Mizoram chhunga Hospital-ah mi 30,565 te inentirna man tum sak tawh niin Mizoram pawnah mi 698 te inentirna man tum sak tawh a ni a. Heng mi 31,263 te inentirna man atana MUHCS in a tumsak tawh zat hi a vai belhkhawmin Rs. 42,06,73,812 a ni.

Nimin-a tlangzarh tak MSHCS Website chungchangah hian Informatics Officer Lalzirtira chuan Technical Report pein he website kaltlang hian MUHCS chungchanga zawhna tam tak awm thin, Empanelled Hospital awm zat te, MUHCS kalphung leh MUHCS chungchanga thuthar apiangte chu rang takin a hriat nghal zel theih tawh dawn a ni. He hunah hian Finance Secretary, Ramchuana leh Officials pawimawh tak tak te telin Lalchhuanawma, Deputy CEO, MSHCS chuan kalkhawmte hnenah lawmthu sawiin hun a khar a ni.