Serchhip bul-a Mat lui khuap turin DPR peihfel thawkhat a ni tawh tih sawilang

Serchhip bul-a Mat lui khuahna tur, ‘Mat Valley Integrated Water Resource Management & Climate Resilient Irrigation Project, Serchhip’ chu DPR peih thawkhat a ni tawh.
Nimin khan Chief Minister Lalduhoma hovin a Pisa-ah Irrigation & Water Resources Department changtu Minister PC. Vanlalruata leh Department Official te chu an hmalakna hrang hrangte an sawiho a, he hunah hian ‘Mat Valley Integrated Water Resource Management & Climate Resilient Irrigation Project, Serchhip’ chu DPR peih thawkhat tawh a nih thu tarlan niin, “A bawhzuitu tur Core Group din a ni,” an ti a. “Tuilak atan te, thlai chawmna atan te, tuihna humhalhna te leh Eco-Tourism te ngaihtuah chunga DPR hi duan niin Brahmaputra Board lamin State budget pawn lam atangin a thawhna tur an ngaihtuah ang,” an ti bawk. Hei bakah hian Brahmaputra Board kaltlang bawk hian Tlawng lui Springshed Rejuvenation kalpui dan tur dap mek a nih thu pawh he hunah hian sawilan a ni bawk.

Nimin-a thutkhawm ah hian Tuidai Multipurpose Project, Mamit chu NABARD atanga sum hmuh cheng vbc. 29.6 senga thawh tur chu a thawktu tur zawnna kalpui mai tawh tur a nih thu pawh sawilan a ni a, Central sawrkar chuan Leilet/Phai thlai tharchhuahna hmunah Science thiamna sang zawk hmanga tuisem kual, Scientific Distribution of Water Resources chu ram pumah kalpui a tum mek thu te, Mizoram-a a thawh khatna turin Champhai leh Mat phai Command Area atan project thehluh phawt a nih thu te an sawi bawk a. Mizoram-a National Hydrology Project leh State Water Informatics Centre kal zel dan tur pawh sawiho niin, Ngur - Vapar Multipurpose Dam siamna tur hmun chu Forest Clearance buaipui tan tura tih a nih thu bakah Serlui ‘B’ HEP tui hman hnu tam tham tak luangral thin chu a thlang lama thlai chingtute tana hman tangkai dan tur zirchian tha an tih thu te an sawi bawk a. Heng bakah hian Department hmasawnna tur thil pawimawh dangte an sawiho bawk a ni.

He thutkhawm ah hian Chief Minister Lalduhoma chuan Kuthnathawk a eizawng kan tam avangin kan loneituten tui tha an mamawh em em tih sawiin, “In Department hian an tana hmalak theihna in nei ngah hle. Vawiin-a kan sawi hmalakna tur leh hmachhawpte pawh hi ram ro tling tur vek an ni a. Project tha tak tak nei phawt ila, kan bawhzui zel dawn a ni,” a ti bawk.