Rel pathum vailiam dawn

Tunkar Inrinni-a Prime Minister Narendra Modi lo zin tur chungchanga inbuatsaihna te chu nimin khan Chief Minister Lalduhoma hovin CM Conference Hall-ah thlirho a ni a, he hunah hian Chief Secretary Khilli Ram Meena chuan September ni 6-a Meeting an lo neih tawh dan leh ruahmanna an lo siamte chipchiar takin a sawi a, hemi hnu hian mawhphurhna hrang hrang neitu ten an inbuatsaihna te an sawifiah a ni. Ruahman lawk ang chuan Prime Minister hi September ni 13-ah lehlangin a lo kal dawn a, a puala vantlang inkhawm chu Aizawl Lammual-ah buatsaih a ni anga, Bairabi - Sairang Rel kawng hawngin Rel Service thar pathum: Aizawl - Delhi Rajdhani Service (Anand Vihar Terminal), Aizawl - Kolkata Express leh Aizawl - Guwahati Express te a vailiam (flag off) ang. Hei bakah hian Zirna In (Institution) thar pahnih a hawng anga, hmalakna thar paruk (6) lungphum a phum bawk ang.