P&E Minister in Sub-Station a hnathawh a enpui

Power & Electricity Department changtu Minister F. Rodingliana chuan Mizoram khawthlang lam Power lakluh leh pekchhawnna tih changtlunna tura North Eastern Region Power System Improvement Project (NERPSIP) hnuaia hna thawh mek 132/33kV Sub-Station West Phaileng leh 132/33kV Sub-Station Marpara te chu nimin khan tlawhin heng Sub-Station te hi hawn thuai a nih theih nan hmabak la awm te a hmun ah a enpui.

Minister hi West Phaileng Sub-Station-ah hnathawktu, Powergrid-te nen inkawmin hmalakna hrang hrangte kalpui dan te a sawipui a. Mizoram khawthlang lamin Power Supply hniang-hnar zawka an neih theihnan heng Sub-Station-te siam zawh thuai dan turte leh Mizoram Sawrkar kuta hlan vat a nih theih dan turte a sawipui a ni.

Minister hian Mizoram-in he 132 kV Sub-Station hi tangkai leh hlawk zawka a hman theih dan tur leh harsatna awm te sutkian dan tur ruahmanna a siampui a. 132/33kV Marpara Sub-Station leh 132/33kV West Phaileng Sub-Station sak hna hi September 2018 khan bultan a ni a, mimal compensation leh Forest Clearance lama harsatna awm avangin hun bituk chhunga zawh hman a ni ta lo a. Tunhnaiah Mizoram Sawrkar hmalaknain Forest Clearance atan cheng nuai 189.71 chu Forest Department-ah pein hnathawh chhunzawm a ni a. Tun dinhmunah hian Sub-Station sak hna leh Transmission line thlun hnate zawh vek tawh niin 33kV Level-a Test charge tawh a ni a, 132kV Level-a test charge leh tur hian Regional Load Dispatch Centre (RLDC)-ah First Time Charging (FTC) phalna nghah mek a ni.

West Phaileng Sub-Station a hnathawh hmabak la awm te hi tun thla chhunga zawhfel hman beisei a ni a, Marpara Sub-Station ah hian hnathawh hmabak la awm hrang hrangte pawh nakum March thla ah chuan zawhfel vek hman beisei a ni bawk.