MLA Trophy Inter School Challenge 2025 lawmman semna hun CM hova hman a ni
Serchhip Teachers' Association (STA) te hian zirlai naupang ten zirna kawnga hma an sawn theihna turin kum 2023 atang khan ‘MLA Trophy Inter School Challenge’ hi buatsaih tanin kumin atan thla hmasa, August thla khan zirlaite ten Exam buatsaih niin nimin khan a tithate hnena lawmman hlanna hun hi Serchhip Sub-Headquarters YMA Hall-ah neih a ni a. He hunah hian Bialtu MLA leh Chief Minister Lalduhoma chuan Inter School Challenge chu hmathlir thui tak nei chunga zirlai naupangte kaihhruaina, nakina National Level Exam leh an kal zelna tur atana lo buatsaih lawkna a nih thu sawiin, kum 2023 atanga he challenge tha taka buatsaih thintu Serchhip Teachers' Association te chungah lawmthu a sawi.
Chief Minister chuan mi tam tak ngaihdanah chuan sawrkar hna a váng tih sawiin, “A tak takah chuan, a thiam tan chuan a vang lutuk lo. State sawrkar hi chuan hna lak tur a ngah lo naa Central sawrkar erawh chuan a ngah hle a. Tribal qouta pawh hi kan hnawhkhat zo thei lo zawk a, lehkhathiam hna nei lo kan tam phah ta a ni,” a ti a. “Kan naupangte hi India rama kan Tribal-pui hnam dangte aia lehkhathiam leh hriam zawk an nih phawt chuan hna hi vang an ti dawn lo. Chutiang mi an nih theih nan chuan an zirlai theuh an hriatchian a ngai a. Vawiin-a an zirlai hi Competitive Exam an hmachhawn hunah a la pawimawh vek dawn avangin he inelna hian kawngro a su hle turah kan ngai. Zawhna kalphung pawh a tunlai ber ber ni zel se a tha hle,” a ti a. Serchhip Bial chhunga mahni zirlai hre ber naupangte chu chawimawi an phu nia a hriat thu sawiin, “An kalna School leh nu leh pate pawhin lo ngaihlu se, he Challenge hrim hrim pawh hi i ngaihlu deuh deuh ang u. Serchhip Bial huapa a thiam ber nihah duh tawk lo ila, Mizoram huap leh India ram huap thlenga kan san chuan kan hmakhua a eng a ni,” a ti bawk.
‘MLA Trophy Inter School Challenge’ hi zirna In hrang hrang, Primary School atanga College/DIET thlenga zir mek te inelna atana buatsaih niin Serchhip Assembly Bial chhunga zirna In hrang hrangte chu Category hrang hrang pasarih-ah thenin anmahni zirlaibu chhung theuh hmangin an intihsiak a. He intihsiakna a senso zawng zawng hi bialtu MLA Lalduhoma hian a tumsak a. Kumin hian Serchhip Bial-a zirna In 28 atangin zirna In 21-a zirlai 172 an tel a, kumin hian Category tinah Top 10 chin te hnenah lawmman hlan an ni a. Nimin-a hemi puala hun hman hi Serchhip Teachers Association (STA) President Vanlalvuana chuan kaihruaiin Secretary John Lalvenzela chuan Report a pe a, zirlaite leh zirtirtute an tel a ni.