Damdawi In 8 te tan Ambulance vailiam

National Health Mission (NHM) hnuaia National Ambulance Service (NAS) enkawl Sawrkar damdawi In-a dah tur 102 Ambulance Motor 8-te chu nimin khan Health Minister Lalrinpuii chuan Aizawl atangin a vailiam.

Aizawl MINECO atanga heng Ambulance vailiamna puala hun hman ah Health Minister Lalrinpuii chuan mipuite mamawh em em Ambulance thar an nei thei ta chu lawmawm a tih thu sawiin, National Ambulance Service chu NHM hnuaia programme pakhat, kum 2013 atanga kalpui tan a nih thu leh Raipuar (Nau neitur) ten thianghlim leh hrisel taka sawrkar damdawi In-a nau an neih theihna tur te, nausen damlo te damdawi In lama kal lam leh haw lam phur kual zung zung thei tura Ambulance ruahman te, damlo (Emergency) engkawl hmanhmawh ngai te damdawi In-a phurh nghal zung zung theihte chu a thil tum ber a ni tih a sawi a. Tunah hian National Ambulance Service, NHM hnuaiah, Ambulance motor 62 awmin District hrang hranga sawrkar damdawi In 59-ah te dah an nih thu leh chungte chu NHM hnuaia Call Centre (102) atanga darkar 24 chhung enkawl (monitor) an ni tih a sawi a. Ambulance-te chu an lo Service rei ve deuh tak avangin a tahtawla a thar a thlak tur a ruahmanna siam zel tum a nih thu a sawi bawk.

Nimin-a vailiam tak Ambulance te hi Chawngte CHC, Sakawrdai CHC, Ngopa CHC, Bunghmun South PHC, Khawbung PHC, Tawipui PHC, West Phaileng PHC leh Rawpuichhip PHC-a dah turte a ni a. Nimin a he hun hman hi Health Department-a Commissioner & Secretary H. Lalengmawia chuan a kaihruai a ni.

National Rural Health Mission (NRHM) hi kum 2005-ah India ram ah kalpui tan niin Mizoram-ah pawh hemi kum vek hian kalpui ve nghal a ni a. NRHM Programme hi kum 2013-ah National Health Mission ti a thlak niin National Health Mission Programme hnuaiah chuan thingtlang bakah khawpui (Urban) lama mipui chengte pawh a huam ta a. NHM hnuaiah hian Committee hrang hrang State Health Mission, State Health Society, Mission Director leh State Programme Management Support Unit-te an awm a ni.