YMA hruaitu ten Dan an zirho

Central YMA leh Mizoram State Legal Services Authority te chuan nizan hmasa khan Aizawl khawpui chhunga Branch YMA hruaitute tan Dan hriatna kawnga inzirtirna Aizawl-a Central YMA Hall-ah an buatsaih.

He hunah hian Mizoram State Legal Service Authority-a Member Secretary Vincent Lalrokima chuan YMA hruaitute chu khawtlang thianghlimna atana tha thawhtu leh tangkai ber berte an nih avangin Dan hriat a tul thu a sawi a. YMA hruaitute tana hriattur pawimawh hrang hrang - ruihhlo man kawnga dan anga man dan tur te, witness chungchang te, POCSO chungchangte leh thil pawimawh dangte sawiin, zawhna leh chhanna hun hman a ni a, kalkhawm ten zawhna chi hrang hrang zawtin MSLSA hruaitute hian an chhang a ni.

He hunah hian Central YMA President Lalhmachhuana chuan Dan inzirtirna Booklet ‘Finchhuahtu’ tih Central YMA hnuaia Legal Sub-Committee leh MSLSA te buatsaih chu a tlangzarh a. YMA hruaitute tana Dan chungchang zirtirna Booklet siam a ni leh Programme siam a nih chungchangah MSLSA te thahnemngaihna lawmawm a tih thu a sawi a, YMA in tha thlah lova ruihhlo hluar zel a do dan a tarlang bawk. YMA hruaitute leh memberte chu Dan hnuaia fim taka ruihhlo do leh khawtlang siamthatna kawnga hma la zel turin a chah a, thil sual titute dan anga hrem an nih theihna turin dan kan hriat ve a ngaih thu a sawi bawk.