Chhiahtlang ram-a mi bo zawn hna thawh tan a ni
Thudawn danin Henry Lalnunsanga (35) s/o B. Kapliana, Aizawl Kulikawn hian kar kalta Zirtawpni, Sept. 5, 2025 khan Scooter in Aizawl atangin Serchhip a rawn pan a, Inrinni zing khan a Scooter hi Chhiahtlang hmarlam dai, khua atanga KM 2 vela hla Tuial kawr bulah kawngsir-ah hmuh niin Chabi a in vuah a, a piah deuh ah Helmet leh a bag ni ngeia hriat chu hmuh leh ni bawkin niminpiah. Sept. 8, 2025 khan YMA hruaitute chuan an enfiah a. A document atangin a chhungte biakpawh niin nimin khan Aizawl lam atangin a chhungte hi an rawn chho bawk a ni.
Hetianga amah an hmuh tak loh avang leh Phone hmang pawha biakpawh theih anih loh avang hian nimin khaan Chhiahtlang Hmar Veng Branch YMA Member te chuan bo zawn hna hi an thawk nghal a, a Phone signal hi Police te chuan chhui zuiin Hmuntha lamah a awm nia hriat niin bo zawng te hi an kal bakah Hmuntha khaw mi te pawhin a theih angin an lo dap nghal a, amaherawh chu nimin tlai thleng khan thu thar hriat tur a awm ta rih lo a ni.
Hetianga an khaw ramchhunga mi bo an awm nia a lan avang hian nizan khan Chhiah-tlang a YMA Branch hrang hrangte chu thukhawm nghalin hmalak dan tur an rel a, an thutlukna erawh he thu buatsaih lai hian hriat hman a ni ta lo thung a ni.