5G Technology nihphung inzirtirna buatsaih a ni
Govt. Serchhip College HD Rosanga Multipurpose Hall-a he hun hman ah hian Bawrhsap chuan 5G chu Education, Healthcare, Agriculture leh thil dang atan a pawimawh thu a sawi a. Tunlai khawvel chang-kang tawh takah sum, hun leh tha tam tak sen ngai lovin 5G Technology hmangin Doctor leh Medical lama mi thiamte rawn zung zung theih a nih thu te, Education ah pawh zirlai puitu tha leh tangkai a nih thu te a sawi a. Sum leh hun khawhrala Meeting tura hmun hla tak tak pan ngai lovin Video Conference te pawh 5G kaltlangin a neih theih a, sawrkar pawhin Digitization nasa taka kalpuiin programme hrang hrang High Speed Internet hmangin a buatsaih thin thu a sawi a. Govt. Serchhip College in 5G Lab tha tak an nei leh a hman tangkai dan tur zirna hun an nei leh zel chu lawmawm a tih thu a sawi a ni.
Amantya Technology leh Govt. Serchhip College te tangkawp buatsaih he zirhona hunah hian Govt. Serchhip College Principal C. Laldintluanga chuan inlawmna thu sawiin, he huna tel zirlaite chu Smart phone chu hun khawhral nana hmang lo tur leh an zirlai puitu atana hmang tangkai zawk turin a chah a. Tunlai technology chhuak thar apiang hmang thiamtu nih tum zel turin a fuih bawk.
Nimin-a he zirhona hun hi Amantya Technologies-a Lead Project Coordinator Sangeeta Borua chuan kaihruaiin Presentation hrang hrang thlirho a ni a. He hunah hian Dr. Jonathan Lalnunsiama, Assistant Professor & Nodal Officer chuan 'PM Industry' hnuaia Skill Development Training hrang hrang kalpui a nih dan te, tunlai khawvel Technology thang chak lutuk kara zirlaite hriat tur pawimawh hrang hrangte leh 5G Technology nihpung leh hna-thawh dan hrang hrang te a sawi bawk.