Bungraw man tihniem ve lo te hrem theih an ni dawn tih sawi

Tun thla ni 22 atanga GST rate thar hman turah GST nei sumdawngte chuan GST rate tlakhniamna bungraw man te an tihniam ve lo a nih chuan hrem theih an ni tih Commissionerate of State Tax-a Deputy Commissioner Lalruatpuia chuan a sawi.

Akashvani Aizawl chuan GST siamthatna, GST 2.0 chungchangah mithiam hrang hrang kawmin State Tax Deputy Commissioner Lalruatpuia chuan GST 2.0 hnuaia thilman tlahniam tur langsar zual zingah Cement leh bawnghnute te a tel tih sawiin, sawrkar laipui chuan GST rate a tihdanglam tak avangin company te chu MRP thar neih a phalsak tih a sawi a. GST danah chuan Anti-Profiteering measures a awm tih sawiin, GST nei sumdawngte chuan GST rate tlakhniamna bungraw man te an tihniam ve lo a nih chuan hrem theih an ni a, September ni 22 atanga GST rate thar hman hunah rate tihhniam tawh, man to a la zuar hriate chu Taxation Office-ah hriattir turin mipuite a chah a, GST rate thar chuan sumdawngte leh sawrkar ni lovin mipui nawlpui, leh loneitute hlawkna tur a ngaihtuah ber tih a sawi bawk.

Lalruatpuia chuan GST-a pawimawh ber chu Tax Invoice a ni tih sawiin, GST registration nei chuan a dawr chhungah thil leitute hmuh theih turin GST registration nei a ni tih a tar ngei ngei tur a ni a, cheng 200 man aia tam an bungraw leitute hnenah Tax Invoice an pe ngei ngei tur a ni tih sawiin, hei hi Cash Memo a ni lo a, invoice-a chhiah pek mil thlapin Tax department-ah chhiah a chhung anga, Tax Department chuan an chhiah chhunluh leh a Invoice pekchhuah hmangin a dik ngei tih an lo finfiah a ngai tawh dawn, a ti a, hei hi sumdawngte leh a leituten ngaipawimawh nachang an hre thin lova, dan anga hrem kher ngai lovin mipuite chu hre turin a chah a ni.