Bana Kaih Scheme Phase II chu Sept. ni 19, 2025 atangin kalpui leh a ni dawn

Mizoram Sawrkar Flagship Program ‘Bana Kaih Scheme Phase II’ chu tun thla ni 19 atang khian kalpui tan leh a ni dawn a. Bana Kaih Scheme Phase II-ah hian Implementing Department pathum telh thar niin Department 18 an awm tawh dawn a ni.

Nimin khan Mizoram State Policy Coordination Committee (MSPCC) chu Planning & Programme Implementation Department Committee Room-ah thukhawmin Mizoram Sawrkar Flagship Program ‘Bana Kaih Scheme Phase II’ kalpui dan tur leh hemi atana pawimawh hrang hrang an sawiho a, Bana Kaih Scheme Phase II hi September ni 19, 2025 atanga kalpui tan tura ruahman a nih thu he thutkhawm ah hian tarlan niin, hemi tur hian dilna thehluhna tur ‘Online Portal’ hman dan turte enchhin a ni a. Chief Ministers’ Special Package dilna pawh Online a kalpui tum a nih tawh avangin dilna thehlut thiam lo te tan Block Development Office (BDO), Sub-Divisional Office (SDO), Deputy Commissioner (DC) Office leh Common Service Centre (CSC)-te hman tangkai tur a nih thu tarlan a ni.

Bana Kaih Scheme Phase II-ah hian Implementing Department 18 an awm a, tun tumah hian Mizoram Khadi & Village Industries Board, ICT leh Mizoram Startup Mission-te telh thar an ni a. Bana Kaih Phase I leh II-a loan emaw, Chief Ministers’ Special Package dawng tawh te leh dawng turte hmalakna vil tur ‘Monitoring Team’ te leh Progress Partner ni tura dilna thehlut te zirchiang tur ‘Search Team’ te mawhphurhna sawiho a ni a. I&PR Department buatsaiha ‘Bana Kaih Scheme Phase II’ sawihfiahna video en ho a ni bawk.

Nimin-a thutkhawm hi an Chairman leh Adviser to Chief Minister KC. Lalmalsawmzauva chuan kaihruaiin Planning & Programme Implementation Department-a Secretary, Lalmalsawma Pachuau chuan Bana Kaih Scheme Phase II kalpuina atana inkaihhruaina tih danglam thenkhatte a sawifiah bawk a ni.