ZMC&H 7th Founding Day lawmna neih a ni; ZMC&H atangin MBBS zirchhuak mi 189 an awm tawh

Zoram Medical College & Hospital (ZMC&H), Falkawn chuan nimin khan ‘7th Founding Day’ lawmna hun hmangin Health Minister Lalrinpuii chuan he hun hi a hmanpui a, ZMC&H atang hian Batch hnih (2018 & 2019 Batch) atangin MBBS zirchhuak mi 189 an awm tawh a ni.

Zoram Medical College & Hospital (ZMC&H) Founding Day lawmna ah hian Health Minister Lalrinpuii chuan thingtlang mipuite thleng phak Healthcare Service a ngaih pawimawh thu sawiin, Mizo mipuite tana ZMC&H hlutzia a sawi a. Tunhnaiah hmasawnna tam tak hmuh a ni chu lawmawm a tih thu sawiin, a hun leh ngaihtuahna zawng zawng Hospital hmasawn nana a sen thin thu a sawi a, ZMC&H in India rama Institution tha ber ber atanga zirchhuak thawktu a nei chu lawmawm a tih thu sawiin, zirlaite tan pawh thil lawmawm tak a nih thu a a sawi a, Zirlaite chu Mizoram-a Cancer hluarna chhante leh natna dangte pawh zirchianga, tihtak zeta bei turin a fuih bawk a. He hunah hian MBBS Intern Hostel sak thar, khum 60 awmna ‘Charles Robert Darwin Hostel’ tia vuah chu Health Minister hian a hawng nghal a ni.

ZMC&H Founding Day lawmna ah hian tunhnaia an hmasawnna hrang hrangte tarlan niin Thluak zai theihna, Neurosurgery Unit leh Lung tha lo zai theihna, Cardiothoracic & Vascular Surgery Unit (CTVS) din thar niin Doctor thiam takin an thuthchilh tawh thu te; PM Abhim Scheme hnuaiah cheng vbc. 25 sengin Critical Care Block sak mek a nih thu te; Hnathawktu mi 120 awm theihna tur sak mek niin 70% sak zawh a nih tawh thu te; MUHCS kalpui a nih hnuin khum 52 awmna Ward bakah Cabin 20 leh ICU 13 dah belh ni tawhin, tun dinhmunah a vaiin khum 505 a awm mek thu te; Mizoram-a a hmasa ber atan Mizoram Health Systems Strengthening Project (MHSSP) hnuaiah Biopsy Compatible CT Scan bun tum mek a nih thu leh National Institute for Locomotor Disabilities (NILD), Kolkata te, National Emergency Life Support (NELS) leh Jodhpur School of Public Health (JSPH) te nena thawhhona thuthlung siam mek a nih thu te pawh tarlan a ni a. Heng bakah hian hmasawnna neuh neuh engemaw zat awmin Laboratory te pawh thawmthat zel a ni a. Nimin-a hawn thar Intern Hostel khum 60 awmna bakah hian mipa Hostel 2 leh Hmeichhe Hostel 3 awm mekin, a vai hian zirlai 600 chuang awm theihna Hostel a awm a ni.

Tun dinhmunah ZMC&H, Falkawn-ah hian MBBS zirlai mi 394 awm mekin, Internship ti mek 98 an awm a, Batch hnih (2018 & 2019 Batch) atangin MBBS zirchhuak mi 189 awm tawhin MBBS zirlai atang hian National Level Essay Writing Competition on Family Adoption Programme-ah lawmman dawng pawh mi 2 an lo awm tawh a, National Level Quiz-ah te pawh lawmman an lo dawng tawh bawk a. Viral Research and Diagnostic Laboratory (VRDL) Team, ZMC&H te chuan India rama diagnostic laboratory ti tha lawmman, ‘Excellence for best VRDL 2024 Award’ an lo dawng tawh bawk a ni.

ZMC&H Founding Day lawmna hi H&FW-a Principal Director Dr. Lalthlengliani chuan kai-hruaiin ZMC&H Director, Dr. John Zohmingthanga hnen atangin Report ngaihthlak a ni a, helai hmun din tan a nih atanga tun thlenga hmalak tawhna te tarlan niin Er. C. Lalenkawla, Sr. Executive Engineer, Project Division-II, PWD hnen atangin Intern Hostel sak dan Technical Report ngaih-thlak a ni bawk.

ZMC&H-ah hian Doctor 372 awm mekin heng zinga 80 te chuan damlo enkawl leh zirtir hna an thawk kawp a, Research lama inhmang bik mi 60 awmin Nursing, Paramedical & Allied staff mi 450 awm mekin, Technical Staff 120 leh Research tilai mi 60 an awm a. MUHCS hnuaiah Medical Officer 2, Nursing Officer 54 leh Group D 13 lak thar ni tawh bawk a ni.