Standard Treatment Guidelines (STG) 2025 tlangzarh

Natna chi hrang hrang 248 nihphung leh enkawlna awmna bu, ‘Standard Treatment Guidelines (STG) 2025’ chu nimin khan Health Minister Lalrinpuii chuan a tlangzarh.

Mizoram puala ‘Standard Treatment Guidelines (STG) 2025’ hmasa ber tlangzarhna hun Health Minister Pisa-a neih ah hian Health Minister Lalrinpuii chuan hetiang thil ropui leh tha, India ram-ah pawh State nazawngin anmahni puala an neih theih loh a vawi khatna atan Mizoram in kan nei thei chu ropui a tih thu a sawi a. Mizoram hmun kilkhawr ber thlenga natna hriat leh enkawlna kawnga Doctor te leh hriselna lama thawktu ten tangkai taka an hman ngei a beisei thu sawiin, hemi buatsaihtu State Health Team te, Core Committee leh Expert Team te chungah lawmthu a sawi bawk.

He Standard Treatment Guidelines Edition hmasa berah hian Natna hrang hrang 248 nihphung leh enkawl dan awmin Specialist hrang hrang ten India mai nilo khawvel huapa mithiamte siam atanga kan State mil leh mamawh tur ang bera an duan a ni a. A bu a siam anih mai bakah hian Web-version, online atanga en zung zung theih tura duan a ni bawk a. Expert Team-ah hian Member 19 awmin Zoram Medical College & Hospital (ZMC&H) atangin experts 13, Civil Hospital Aizawl atangin experts 3, Kulikawn Sub-District Hospital atangin expert 1, Directorate of Hospital and Medical Education leh Mizoram State Health Care Society atangin Expert pakhat ve ve an tel a ni.