Serchhip-ah National Deworming Day 2025 hmangin Rulhut hlo pek beihpui thlak tan leh a ni
National Deworming Day (NDD), 2025 pual hian Serchhip-ah chuan Govt. JM H/S-ah hun hman a ni a, he hunah hian Serchhip-a Deputy Chief Medical Officer (CMO) Dr. Lallawmkimi Chhakchhuak chuan Deworming Day chu Rulhut do beihpuithlakna a ni ber tih sawiin, he beihpui thlakna hi India ramah kum khatah vawi hnih hman thin a nih thu leh February thla leh August thla ah hman thin a nih thu a sawi a. National Deworming Day (NDD)-ah hian naupang kum khat (1) atanga kum 19 te hnenah Rulhut hlo pek thin niin Anganwadi leh School-a kal te chu an kalna hmun ah pek thin a nih thu leh School kal lo te pawh ASHA ten an In lamah kalchilhin Rulhut hlo hi an pek dawn thu a sawi a ni.
Dr. Lallawmkimi Chhakchhuak chuan Rulhut kan pai theihna chhan hrang hrang a awm thu pawh sawiin, Rulhut pai lohna turin thil kan ei dawnah kut silfai a pawimawh thu leh thla ruk (6) dan ah Rulhut hlo ei thin a pawimawh thu a sawi a. Mihring in Rulhut kan pai chuan a lanchhuah dan hrang hrang awmin, heng Rulhut te hian damna atan kan thil ei te an rin ve avangin taksa-a thak leh vual te, Pumna, Kawthalo, luakchhuak, chaw ei tui lo leh nun zuai tak bakah thisen tlakchhamna te a thlen theih thu leh natna dang tam tak a thlen theih thu a sawi a. Mi tu pawhin Rulhut hlo ei kan mamawh thu leh thla ruk (6) dan ah ei thin tur a nih thu pawh sawiin, nu leh pa te pawhin kan fate eitir nachang kan hriat laiin puitling zawk ten kan hre lo fo tih a sawi a. Hei vang hian chhungkua a ei thin te pawh a tul thu a sawi bawk.
Serchhip-a National Deworming Day puala hun hman hi Govt. JM H/S Principal. C. Lalrammuana chuan kaihruaiin he hunah hian zirlai naupangte hnenah Rulhut hlo pek beihpui thlak nghal a ni bawk a. Tun tumah hian Serchhip District pumah kum khat atanga kum 19 mi 22,874 te hnenah Rulhut hlo hi pek tura ruahman a ni.
National Deworming Day hi Sawrkar laipui hnuaia Ministry of Health and Family Welfare hmalakna niin naupang kum 1 atanga kum 19 inkar ten Rulhut an pai lohna tur leh rulhut pai avanga nghawng tha lote inzirtirna atan rampumah kumtin February ni 10 leh August ni 10-ah te hman thin a ni a. Zirlai naupangte chu rulhut chungchang hriattur hrang hrang zirtir an nih bakah rulhut hlo, Albendazole 400 mg pek an ni dawn a ni.