Larsap in Serchhip-a sawrkar Department hotute hmasawn zel tura theihtawp chhuah turin a fuih

Mizoram Larsap General (Dr) Vijay Kumar Singh chuan nimin khan lehlanga Serchhip rawn tlawhin amah lo hmuaktu sawrkar Department hotu kalkhawmte chu an lakah beiseina sang tak a neih thu a sawi a, tun aia hmasawn zel tura theihtawp chhuah zel turin a fuih bawk.

Larsap hian Helicopter hmanga Serchhhip hi rawn thlengin New Serchhip Helipad-ah Bawrhsap Paul L. Khuma, SP Gavit Gogna leh Brig. Pushpendar Sorayan, DIG HQ Assam Riftes te'n lo hmuakin Guard of Honour pek a ni a. Hemi hnu hian Serchhip DC Pisapui Hall-ah Sawrkar Department hotute kawmin District mawi leh nuam tak Serchhip District-ah hmalakna fakawm tak tak hmuh tur a awm chu lawmawm a tih thu a sawi a, Official-te chungah beiseina a san avangin tun aia hmasawn zel tura theihtawp chhuah zel turin a fuih a. India rama ziak leh chhiar thiam tamna ber District an nihna chu zirlaite chher hriam nan leh chhawr tlaka siam nana hman tum turin a fuih bawk a. National Education Policy 2020 tha taka kalpui a tul thu leh Sawrkar laipuiin zirna tihhmasawn nan sum leh pai tam tak a sen thu sawiin, Mizorama School tha tak tak -Eklavya Model Residential School, Kendriya Vidyalaya, Sainik School School leh Jawahar Navodaya Vidyalay-te banphaka Sawrkar laipuiin a chhawpchhuahte chu chhawr tangkai turin mipuite a chah a. Tunhmain Central Service-ah Mizo an awm nual thin thu sawiin, zirlaite chu hemi lam ngaihtuah tur leh Sawrkar laipui administration-a Mizo tam zawk an luh theih nana theihtawp chhuah turin a chah a ni.

Larsap chuan Sawrkar laipuiin mipuite dawmkan nan Scheme tha tak tak a siam thu sawiin, Official-te chu a bik takin Tribal tana duan Special Scheme-te zirchianga a mamawhtu dik tak te'n an chhawr tangkai theih nana tan la zel turin a chah a. Loneitute thlai thar sawngbawlna leh Organic thlai thar lama tanlak chu nakin zel atana pawimawh a nih thu sawiin, Department hotute chu farmer-te tan tha thlah lova hma la turin a chah a. Ruihhlo hluar zelin pawikhawihna a tih punlun thu leh a dolet kawngah khawtlang anga tanrual a tul thu sawiin, kan thalai, nakin lawka kan ram inghahna turte hi ruihhlo lak ata chhanchhuak turin theihtawp kan chhuah tlan a tul thu a sawi bawk.

Serchhip Addl. DC Lalrinzuala kaih-hruai he hunah hian Serchhip Bawrhsap Paul L. Khuma chuan Serchhip District-a Sawrkar hmalakna tlangpui sawifiahin thuneitue hnena mipuite'n lungawi lohna te awlsam taka an thehluh zung zungna tur ‘Vantlang Viltu Application’ siam a nih thu leh hnathawh tawh dan, Fund dawn dan leh neih zat awlsam taka en mai theih turin MLA Fund digitise a nih bakah Jal Jeevan Mission chu 100% zawhfel a nih thu a sawi a. NH-54 thawmthat leh tihzau hna pawh 100% zawh thawkhat a nih thute, Bana Kaih (Handholding) Policy kaltlangin Sawhthing quintal 8845.28 lei a nih thu leh farmer-te Account ah Rs. 4,20,64,748/- thun a nih tawh thute, PGCIL sum cheng vbc. 21 leh NESIDS sum cheng vbc. 50 hmanga District Hospital sak mek a nih thu leh Solid Waste Management lamah theihtawp chhuaha hmalak chhoh a nih thu bakah Serchhip Town Beautification Project tha taka kalpui a nih thute a sawi bawk.

Serchhip SP Gavit Gogna chuan Dan leh thupek kenkawh kawnga hmalaknate sawifiahin, kumin ah July thla tawp thlenga chhinchhiah danin pawikhawihna thleng zingah mi In rawk (41%) a tam ber thu leh rukruk (22%) leh case dang 37% a awm thu a sawi a. Heroin tum 4 man niin heng te hi avaiin gram 127.29, a hlut zawng Rs. 3,80,680/- hu a ni a. Rakzu litre 1,286 man niin, Rs 6,43,000/- hu a ni a. Heng bakah hian Urea bag 300, Rs 7,20,000/- hu an man tawh a. Myanmar raltlan 647 leh Bangladesh 266 nei mekin, Myanmar raltlan 132 te Biometric Enrollment zawhfel tawh a ni.