Police ten ILP enfiah runpui tum 10 nei tawh

Serchhip Police te chu kumin (2025) chhungin ILP enfiah hna thawkin tum 10 lai an thawk-chhuak tawh a, Permit fel lo mi 14 hmuhchhuah ni tawhin heng mite hi hremna pek an ni.
Nimin khan Serchhip DC Meeting Hall-ah District Bawrhsap Paul L. Khuma hovin Serchhip SP Gavit Gogna, Serchhip Town Joint VC Chairman, Sub-Headquarters YMA Serchhip President leh sawrkar Official te chu thukhawmin Serchhip District-a hnamdang, Inner Line Permit (ILP) nei lo te dapchhuah chungchanga hmalak dan tur an sawiho a, he hunah hian Serchhip Police te chuan kumin (2025) chhung hian hnamdang phalna nei lo-a awm te dapchhuah hna thawkin Serchhip-ah tum 10 lai ILP enfiah hna hi an thawh tawh thu leh mi 364 te Permit enfiah sakin an zinga mi 14 te chu dan bawhchhia an ni tih hmuhchhuah a nih thu an sawi a, heng mite hi hremna pek an nih thu an sawi bawk a ni.

He hunah hian ILP enfiah hna kalpui zel dan tur pawh sawiho nghalin thla tin ILP enfiah hna thawk tura fehchhuah thin nise an ti a, a thawh khatna atan August 2025 chhung hian YMA Branch tinah ILP enfiah runpui hi neih nise an ti a, a hun tur tak erawh tarlang lawk lovin ruahmanna siam nise an ti a, ILP enfiah runpui hi Police te leh YMA Branch te tawngkawpa neih thin tur a ni ang.

Sub-Hqrs. YMA Serchhip President Kawlthuama chuan tunhnaiah Assam State in an State chhunga Dan lova ramdang mi awm te an hnawhchuah avangin heng mite hi kan District ah an rawn luh lohna tura theihtawp chhuah tlan a tul thu a sawi a, hemi kawngah hian Branch tin te pawh fimkhur tura an in chah thu a sawi bawk a ni.