Mizoram kawngpuite a lo that zawk theihna turin Mizoram PWD leh Central YMA in MoU an ziak thar

Mizoram kawngpuite a lo that zawk theihna turin a tum thumna atan nimin khan Mizoram PWD leh Central YMA chuan thawhhona thuthlung (MoU-2025) an ziak.

PWD Engineer-in-Chief Conference Hall-a thawhhona thuthlung an ziah thar ah hian Central YMA aiawhin an President Lalhmachhuana leh General Secretary Prof. Malsawmliana te’n hming ziakin PWD aiawhin Engineer-in-Chief Er. H. Zoramliana leh Chief Engineer (Planning) Er. C. Lalthlamuani ten hming an ziak a. MOU hmasa ber chu June 14, 2018 khan ziah niin a vawihnihna chu July 14, 2022 khan ziah leh niin tuna ziah thar leh hian August 8, 2025 atanga kum 3 chhung (August 2028 thleng) a huam dawn a, Thawhhona thuthlung thar hi hlawhtling taka kalpui a nih theihna’n PWD hotute leh Central YMA te’n anmahni ve veah inhrilhfiahna hun siamin Joint Monitoring Group siam a ni ang a, kum khatah tum 2 tal thawhhona chungchanga hmalakna thlirho nise an ti a ni.

He thawhhona thuthlung hi hlawm 5-ah then niin Awareness Campaign chungchang ah hnathawh tur lian zual deuhah bul tan a nih hma in a bialtu PWD hotute ruahmanna in hnathawhna tur huamchhunga YMA Branch/Group/Sub- Hqrs. hruaitute nen Project nihphung, hnathawh dan tur leh tul dangte inhrilhfianna neih thin nise tih a ni a. Informatory Board chungchang ah Project intanna leh tawpna, a paltlang kawng/khua ah te detailed information PWD in a duan angin Informatory Board, PWD senso in tar thin tur a ni a, a venhim hi YMA mawh a ni ang.

Inspection & Monitoring chungchang ah Hnathawh laiin hun remchangah PWD leh YMA hruaitu ten Joint Inspection an nei ho anga, a tul dan a zirin Bialtu MLA/Sawrkar hotu dang leh NGO dangte pawh sawm theih a ni anga, Inspection Programme hi PWD leh YMA te inberawn a siam thin tur niin Inspection Report chu PWD leh YMA-ah thehluh thin tur a ni. Tihtur dang ruahman ah Hna thalo a awm chuan, YMA-in a mala hma la mai lovin, bialtu EE/SDO te nen sawiho a nih hnuah Department-in Contractor-te hi instruction pek thin tur a ni anga. Kawng thatna tura YMA-in rawtna ziaka a siamte Department-in mumal taka lo dawngin, Department hmalaknate Branch YMA-ah ziaka hrilh thin a ni ang a. Contractor leh an hnathawkte himna tur leh harsatna an tawh loh nan a tul hunah Branch YMA leh Department ten hma la thinin heng bakah hian kawngpui himna atana hmalakna tur hrang hrang tarlan a ni bawk.