DC Office kaltlanga ngaihsak ngai zual te thleng phak Scheme kalpui Larsap in entawntlak a ti

Mizoram Larsap General (Dr) Vijay Kumar Singh chuan nimin khan lehlangin Lunglei a tlawh a, Sawrkar Department hrang hrang hotute nen an inkawmna ah DC Office kaltlanga ngaihsak ngai zual miretheite thleng phak Scheme tha tak tak kalpui a ni chu entawntlak a tih thu a sawi.

Lunglei tlawhtu Larsap hi Kawmzawl Helipad-ah Bawrhsap mawhphurhna la mektu Addl. DC Rochuangkimi Khenglawt leh Lunglei SP J. Lalmuankima te'n lo hmuakin Lunglei DC Conference Hall-a Sawrkar Department hotute a kawm nghal a, he hunah Mizorama khawpui hmasa berte zinga mi Lunglei a tlawh thei chu lawmawm a tih thu Larsap chuan sawiin, DC Office kaltlanga ngaihsak ngai zual miretheite thleng phak Scheme tha tak tak kalpui a ni chu entawntlak a tih thu a sawi a. DC Office pan harsate tan remchang siam saka an harsatnate chinfel sak zel tum turin a chah a. Sawrkar laipuiin zirna tihhmasawn nan sum leh pai tam tak a sen thu leh Mizoram-ah ngei pawh School tha tak tak, Eklavya Model Residencial School (EMRS), Kendriya Vidyalaya leh Jawahar Navodaya Vidyalaya (JNV)-te mitin banphaka a chhawpchhuah thu sawiin, heng te hi Central Service-a inziahluh nana chhawr tangkai tum turin mipuite a chah a ni.

Larsap chuan hmeichhia, naupang, thalai, loneitute leh miretheite tan Sawrkar laipuiin Scheme tha tak tak a siam thu pawh he hunah hian sawiin, hengte hian hamthatna dawng tur dik takte a thlen theih nana theihtawp chhuah tur leh a tulna apianga kaihkawpa thawhhona tha nei turin Department hotute a chah a. Dan leh thupek kenkawh leh ruihhlo do kawngah khawtlang huapa tanrual a tul thu sawiin, NGO leh Kohhrante chu hemi kawngah hian theihtawp chhuaha Sawrkar thlawp zel turin a fuih a. Thenawm ram leh kan chhehvela thil thlengte ngaihvena beng chhit tlan reng a tul thu pawh sawiin, dan leh thupek kenkawh leh ram venhim kawngah mipuite chu thuneitue tha taka tawiawm tlat thin turin a chah a ni.

He hunah hian Lunglei Addl. DC Rochuangkimi Khenglawt chuan inlawmna thu sawiin, Lunglei District chanchin tlangpui leh DC Office kaltlanga hmalakna te a tarlang a. Healthy Lunglei District Campaign hmangin mipui hrisel zawk nan natna inkaichhawn theih loh zawn-chhuah beihpui Camp tum 39 neih a nih thu te, Vohbikte tan Project LEAP kalpui a nih thu leh District chhunga khaw 6-ah Good Governance Campaign, ‘Prashasan Gaon Ki Ore-I kawtkaiah Sawrkar’ kalpui a nih thu a sawi a. Heng bakah hian Aspirational RD Block Lungsen-ah raipuar leh naupangte hrisel nan Project BLOOM kalpui a nih bakah, Elementary English Literacy Programme kalpui a nih thu a sawi bawk.

Hei bakah hian Lunglei SP J. Lalmuan-kima hnen atangin Dan leh thupek kenkawh kawnga hmalaknate ngaihthlak a ni bawk a. Kumin chhungin July thla tawp thlengin BNS hnuaiah thubuai 89 leh Local & Special Law hnuaiah thubuai 127 ziahluh a ni tawh a. Heroin kaihhnawih thubuai 13 ziahluh tawh niin Heroin hi gram 1625.88 man a ni tawh a, hei hi Rs 48,66,450/- hu a ni a. Heng bakah hian ralthuam kaihhnawih thubuai 2 ziahluh a ni tawh bawk.

Hemi hnu hian Larsap chuan 20th Assam Rifles Hqrs. Lunglawn tlawhin Commandant Col. Jaswinder Singh, SM chuan an hmalakna te a hrilhfiah hnuah sipaite a kawm a. Lunglei Circuit House-ah tlawmngai pawl, Kohhran hruaitute leh Ex-Servicemen te kawmin an harsatna leh bawhzui ngaite hmalak pui turin Larsap hnenah hian an lo thlen bawk a, hei bakah hian Lunglei Chanmari-a War Memorial chu tlawhin sipai martarte zahna lantir nan pangpar a dah bawk a ni.

Ruahman lawk ang chuan Mizoram Larsap hian karleh khian Serchhip District a rawn tlawh ve leh dawn a ni.