Mizoram-ah ASF vanga sum hloh zat cheng vbc. 982.16 a tling tawh nia chhut a ni

Kum 2021 March 21-a Lunglei District chhung Lungsen khuaa African Swine Fever (ASF) hri hmuh a nih hnuah Mizoram-ah Vawk 69,411 zet thi tawhin Vawk 52,194 te chu suat a ni tawh bawk a, Vawk hri leng avang hian cheng vbc. 982.16 vel zet Vawkvulhtute chuan an chan tawh a ni.

Mizoram Larsap, General (Dr) Vijay Kumar Singh chuan nimin khan Raj Bhavan-ah AH&Vety Department-a Secretary Lalsangliana leh thawktu dangte kawmin Vawk pul hri, African Swine Fever (ASF) chungchanga Mizoram dinhmun bakah Department hmalakna leh hmachhawp tlangpuite a sawipui a. He hunah hian AH&Vety Department-a Deputy Director (DI&E) Dr. Esther Lalzoliani chuan ASF chungchanga Mizoram dinhmun leh pawimawh hrang hrangte a lem nen sawifiahin, March ni 21, 2021 khan Lungsen khuaah Mizoram-a African Swine Fever (ASF) case hmasa ber report a ni a. Niminpiah August ni 3, 2025 thleng khan ASF avanga vawk thi zat chu 69,411 niin hri leng darh zel tur ven nana Vawk suat (culled) 52,194 a awm tawh bawk a. He hri leng hian chhungkua 11,424 te nghawngin, cheng vbc. 982.16 hu vel chan tawh anga chhut a ni. Sawrkar laipui atangin Assistant to State for Control of Animal Disease leh State Sawrkar kaltlangin Vawk suat compensation cheng nuai 1451.915 sem chhuah a ni tawh a, heng bakah hian Mizoram DM&R Department kaltlangin Vawk thi compensation cheng nuai 477.08 pekchhuah a ni tawh bawk.

He hunah hian Larsap General (Dr) Vijay Kumar Singh chuan African Swine Fever-in Mizoram-ah kum 4 lai harsatna a thlen tawh thu sawiin, hemi avanga sum leh pai channa nasa tak thleng leh mipuite khawsak leh nunphunga nghawng nasa tak thlengte chu veiawm a tih thu a sawi a. Vawk hrileng thunun tura AH& Vety Department hmalakna, hemi kawnga harsatna tawh leh rawtna an neihte hriat a duh avanga meeting neih a nih thu sawiin, ASF avanga harsatna thlengte khuahkhirh turin Department mal hmalakna a tawk lova, Line Department hrang hrangte leh mipuite nena thawhhona tha neih a ngai tih sawiin, harsatna leh rawtna an thlente chu theihtawp chhuaha lo bawhzui sak a tum thu a sawi bawk.

AH& Vety Department hotute chuan Mizoram chu ASF in a chenchilh tlat tawh avangin khuahkhirh turin hri danna (vaccination) kalpui chu hmalak theihna awmchhun a nih thu Larsap hi hrilhin, tun dinhmunah India ramah ASF vaccine a awm loh avangin a siamchhuaktu Vietnam atanga lakluh dan a awm em tih ngaihtuah a tul thu an thlen a. Sawrkar laipui atanga fund hmuh kawngah harsatna a awm avanga compensation duh anga pek theih a nih loh thu pawh an thlen bawk.

Mizoram chu Disease Diagnostic Laboratory tihchangtlunna tur, Pandemic Fund Project dawng tur Phase I-a State 14 thlanchhuah zinga a tel thu leh he project hnuaiah hian NABL Accreditation nei turin hmalak thuai tum a nih thu he hunah hian tarlan a ni a. Laboratory-ah hian kumin March atang khan sample 221 test niin heng zinga 142 te chu ASF a ni tih PCR hmanga finfiah a ni.

ASF avanga harsatna tawhte zirchiang turin National Institute of Veterinary Epidemiology and Disease Informatics (NIVEDI) Scientist/expert-te biakfel an nih tawh thu leh September-ah Mizoram an rawn tlawh hman beisei a nih thu tarlan a ni bawk a. Heng bakah hian ASF chung-chang inzirtirna zau zawk kalpui leh thu pawimawhte inhrilhhriat zung zung dan turte, Line Department dangte nena tanrual dan turte, Vawk thi sawngbawl dan bakah pawimawh dangte pawh sawiho a ni.

He hunah hian AH&Vety Department Director Dr. R. Zothanmawii leh Joint Director Dr. PC Lalsangzuala te an tel a ni.