Civil Hospital Aizawl-ah Kal thlak theih ve tura hmalak chhoh mek a ni

Health Minister Lalrinpuii chuan Civil Hospital Aizawl-ah Kal thlak theih ve tura hmalak chhoh mek a nih thu a sawi.

State Organ & Tissue Transplant Organisation (SOTTO) Mizoram, Directorate of Hospital & Medical Education te buatsaihin nimin khan Aizawl-a DHME Auditorium-ah ‘15th Indian Organ Donation Day’ chu hman a ni a, he hun hi hmanpuiin Health Minister chuan he ni puala thupui thlan ‘Organ Donation-Life saving campaign - Nunna chhan nana Taksa peng pek beihpui thlakna’ tih chu Pathian in mihringte a siam ropuizia leh kan thih hnu thleng pawha theihna leh malsawmna a lo dah tam zia min hriatchhuahtirtu nise a duh thu a sawi a; India ramah organ thlak ngai mi tam tak awmin Mizote zingah ngei pawh mi engemaw zat an awm thu leh nunna hial chan phah pawh an awm thu a sawi a. Sawrkar laipui hnuaia Transplant chungchanga thuneitu, National Organ & Tissue Transplant Organisation (NOTTO) report-a a lan danin, India ramah Kal thlak ngai bikah kum khatah mi nuai 2.5 bawr vel mamawhtu an awm laiin, mi 5000 bawr chauhin Kal dawn tur an nei tih a sawi a; Thin thlak ngai mi Singnga-ah mi 1500 bawr vel chauhin a thlakna tur an hmuh thu leh Lung thlakna tur pawh pawh kum khat ah mi 5000-ah mi 200 aia tlemin an hmu tawk bawk niin a sawi.

Health Minister chuan mamawhtute hnena taksa peng pek - organ donation chu a ngaih pawimawh thu sawiin, Mizoram-ah pawh kalpui a nih ve theih nan Health Care Facilities thuamchak tura hma lak mek zel a nih thu a sawi a. Sawrkar laipui nen tangkawpin SOTTO Mizoram kaihhruaina hnuaiah a bul tan nan Civil Hospital Aizawl-ah Kal thlak theih ve tura hmalak chhoh mek a nih thu sawiin, India rama Kal natna bika hmingthang em em, Institute of Kidney Diseases and Research Centre, Ahmedabad-te nen MoU buaipui mek a nih thu a sawi a ni.

Indian Organ Donation Day lawmnaah hian Dr. Lalthlengliani, Principal Director, Health & Family Welfare Department chuan Mizorama Organ Donation Life Saving Campaign kalpui a nih tan dan a sawi a. Dr. Joseph Lalhmachhuana, Nephrologist, Synod Hospital Durtlang hnen atangin Taksa peng pek - Organ Donation pawimawhna ngaihthlak a ni a; Dr. Catherine Lalmuanawmi, State Nodal Officer, NP-NCD hnen atangin Non-Communicable Disease laka inven dan ngaihthlak a nih bakah Organ petute leh dawngtute hnen atangin an tawnhriatte ngaihthlak a ni bawk a, he ni puala buatsaih Reels insiamsiaka titha Top-3 te hnenah lawmman sem a ni bawk.

SOTTO Mizoram hi Union Ministry of H&FW hnuaiah National Organ Transplantation Programme (NOTP) hnuaia chak zawk leh fel fai zawka hmalak a nih theihna tura State Level-a din a ni.