Minister hovin Zirtirtute Ni hman dan tur ngaihtuah

Kumin September 4-a (Ningani)-a ‘Teachers' Day 2025’ hman dan tur relin nimin khan State Working Committee for Celebration of Teachers' Day chu School Education Minister Dr. Vanlalthlana hovin an thukhawm a, kumin hian September 5 chu sawrkar Pisa chawlh a nih avangin a hma ni, Sept. 4-ah Teachers' Day hi hman tura ruahman a ni a, District Level Teachers’ Day lawm chungchangah District tina Deputy Commissioner te Chairman-na hnuaiah lawm dan rel nise, Zirtirtu chawimawina dawng tawhte tan anmahni khua leh vengah chawimawina hun siam nise an ti a. National Foundation for Teachers Welfare pawh an sawiho bawk a ni.

He thutkhawm ah hian Education Minister Dr. Vanlalthlana chuan Zirtirtute pawimawhzia sawiin, naupang chu a tette atanga zirtirtu thain zaidawh tak leh awmze neia a enkawl chuan a hlawhtlinna kawng a awlsam bik tih zirmite’n an fiah tawh tih a sawi a. Sawrkar hnuaia zirtirtute tana hamthatna hrang hrang tarlangin, Insurance tih pawimawhzia a sawi a. Zirtirtute Ni ropui tak leh hlawkthlak taka hman a nih a, zirtirtu hna chawisan a lo nih zel theih a beisei thu a sawi bawk.