Larsap in Assam Rifles leh Shalom School a tlawh

Serchhip-a rawn kal Larsap General (Dr) Vijay Kumar Singh chuan nimin khan Serchhip-a 14th Assam Rifles Battalion Hqrs. tlawhin Commandant Col. Archit Goswami SM chuan an hmalakna te hrilhfiahin sipaite a kawm a bawk a ni.
    Hemi hnu hian Larsap hian Shalom Special School pawh tlawhin School naupang te, Zirtirtu leh Managing Board Member ten an lo dawngsawng a, Larsap hnenah hian ngenna hrang hrang lo thlenin heng zingah hian he School a thawktute hlawh chungchang te, Chief Minister in School Bus tur a pek ah Driver leh Diesel man ngaihtuah sak tur te, Mid-Day Meal an dawn ve theihna tura hmalak sak tur leh an School building chu CSR hmanga sak that anih theih nan hmalaksak turin an ngen a. Larsap hian Assam Rifles hotute chu building mamawh leh thawmthat ngaite lo enzui turin a chah bawk a ni.

Serchhip-a Shalom Special School building tur sak a nih dawn kum 2010 khan tuna Mizoram Larsap, Larsap General (Dr) Vijay Kumar Singh  hian lungphum a lo phum tawh a, khatihlai khan General Officer Commanding-in-Chief Eastern Command hna a chelh a ni.